Leksyon sa mamunit

Kini bitaw nga magpataka kita og pamunit, ilabi na og nakakita g'yod ta nga kadudahan kaayo ang tawo nga maoy naglabay sa butang, duha ra ang padulngan.

Posible nga kon dunay kwarta o mahinungdanong butang ang gilabay, mahimong maimo. Apan duna usa'y posibilidad nga makadaut kanimo ang pagpataka og pamunit sa butang nga gilabay.

Kini maoy leksyon nga nakuha ni Oscar Lubiano, usa ka barbecue vendor nga taga Camputhaw kinsa nakahilak g'yod kagahapon dihang gikonbikto siya og robbery.

Kon toohan nimo si Lubiano, napunitan ra kuno niya ang bag nga gilabni sa usa ka snatcher gikan ni Jeneen Garcia kaniadtong buntag sa Oktobre 24, 2003.

Naglakaw si Jeneen didto sa Queens Road sakop sa barangay Camputhaw - duol sa Redemptorist - mga alas 10 sa buntag dihang kalit lang misakdap kaniya ang daw banog nga snatcher.

Dala ang iyang bag. Misuway unta pagkupo-kupo si Jeneen aron mabawi niya gikan sa snatcher ang iyang bag, apan gipakitaan siya og kutsilyo nga maoy nakapahadlok kaniya.

Igo na lang siya nga nagpanawag og tabang. Tuod man, dihay mitabang nga motorista - ang polis diay nga si SPO2 Rex Cabrera - og migukod sa snatcher.

Matud ni Lubiano nga gikan siyang naghatud og pagkaon sa iyang manghud nga nagtungha sa USC-Boys High School sa General Maxilom avenue.

Gibilin ra niya ang bawon sa gwardya og naglakaw siya paingon sa gitrabahoan sa iyang amahan sa unahan nga bahin, dihang may nakita siya nga tawo nga nagdagan.

Nakita niya nga ang tawo milabay og bag daplin sa karsada. Iya kunong gipunit apan kalit lang siyang gidakop ni SPO2 Cabrera nga maoy migukod sa snatcher.

Matud pa nga intak ug walay nawala sa tanang butang nga sulod sa bag. Ug may kutsilyo pa nga nakuha gikan ni Lubiano.

Bisan dili kaayo sigurado si Jeneen nga si Lubiano ba maoy snatcher, apan diha kang Lubiano nakuha ang bag. Pareho mi si Judge Simeon Dumdum Jr. nga nakapangutana.

Kon dili pa siya maoy snatcher nganong duna man siya'y kutsilyo nga igo ra man kaha siyang naghatud og pagkaon sa iyang manghud.

Pananglit toohan nato si Lubiano nga dili siya maoy snatcher, dili gihapon mawala sa atong pagduda nga kauban siya. Nasayod kita nga ang snatchers dunay mga kauban.

Apan ibutang nato nga dili gayod siya maoy snatcher, lisud usab nga iabswelto siya sa kaso kay ang butang kinawat gikan ni Jeneen diha makuha gikan kaniya.

Ang silot ni Lubiano mao ang walo ka tuig ang pagkapriso.

* * *

Dunay mireklamo nga driver/operator nga nagbiyahe sa rota 04L - Lahug-Ayala-SM nga mireklamo. Inig-abot kuno nila sa SM patuyokon sila ngadto sa Kaoshiung Street ba na diha, apan dili sila tugotan nga maka-pick up og pasahero.

Ang ilang reklamo mao nga kas na sa gasolina ang pagtuyok sa layo nga rota apan dili sila tugotan nga makapasakay. Dihay higayon nga gidakop siya kay nagpasakay og pasahero atubangan nianang gamay nga diesel refueling station.

Tambag nako ninyo Bay, pagbuhat mo og pormal nga reklamo og ipadala sa Citom para matuki sa mga sakop sa Citom Board atol sa tigum nila matag Miyerkules.

Hatagi lang ko og kopya aron akong mahimoan og follow-up. Apan husto baya ang pagdili sa Citom nga dili makapataka og hunong sa inyong sakyanan Bay.

Kon himoon kini ninyo, mahasol ang ubang mga sakyanan. Sama anang mga abusado nga drayber nga panahon sa gabii, anha maghuwat og pasahero diha sa eskena. Sa laktud bastos kaayo kay gihimo nila nga paradahan ang maong dapit.