Rally nga malinawon

Dili masayon nga dagmalan ang atong lawas. Ang tinuod, gawas niadtong panahon sa akong kabatan-on nga nagbansay-bansay ko og pamoksing, wala na g'yod ko makadapat og tawo.

Sakitan ko nga magtan-aw nga dunay tawo nga dagmalan. Nakasaad man gani ko nga kon may makit-an ko nga daug-daugon nga walay sala, labanan g'yod nako.

Apan lahi ang nakita nako kagahapon sa footage sa television sa mga panghitabo didto sa Manila. Uwahi ko nga nasayod nga may gubot diay sa Manila duna ko'y gibasa nga court records.

Miduol ko sa akong mga kauban nga nagpundok sa TV monitor namo sa opisina. Maoy misugat sa akong panan-aw kadtong tawo nga gibunal-bunalan sa mga polis.

Unya, gibalik-balik sa pagpakita ang footages diin dunay mga raliyista nga nanglabay og bug-at nga butang ngadto sa mga polis nga nagsilbi nga crowd control team.

Duna pay nagsigi og panawag sa iyang mga kauban nga buot g'yod niya nga moatraka sa mga polis. Ang ingon niadto nga mga talan-awon, makapawagtang sa kalooy.

Gitug-anan ko ni Atty. Alex Tolentino, ang presidente sa Integrated Bar of the Philippines-Cebu City chapter, nga mora'g ang mga polis miabuso na sa ilang katungdanan.

Nagtoo ko nga ang mga gipangsiritan og tubig ingon man gipangdakop mga yano ra nga tawo. Apan sakop man diay sila sa mga militanteng grupo.

Prangka lang ko nga mosulti nga wala usab ko makagusto sa kalihukan sa mga militanteng kahugpungan. Motoo ko nga nasakyan na sila sa mga rebelde.

Motoo usab ko nga daghan sa ilang mga sakop ang nadani ra nga mouban apan wala masayod sa tinuoray nilang tumong. Aw bisan pa og mo-pick up ta og pipila kanila unya atong pakighinabian.

Ang dili lang nako magustohan mao ang paggamit nila og red color nga mga streamers. Hinoon walay balaod nga nagdili paggamit og red color nga streamers sa mga rally.

Apan magpasabot kini nga init ang ilang huna-huna. Mao na nga usahay madungog nimo sa ilang mga pakigpulong. "Usa ka mainiton ug mapula nga pakigbisog!."

Husto sila nga ang katawhan angay na g'yod karon nga magbagolbol batok sa kagamhanan tungod sa grabeng kalisud nga atong gitagamtam mugna sa pagsaka na og maayo sa presyo sa palaliton.

Apan ang atong mga rally o demonstrasyon himoon nato sa malinawon nga paagi. Kon duna man kita'y streamers, mas maayo unta nga ang atong gamiton mao ang panapton nga puti.

Kon gusto ninyo nga pukanon ang kagamhanan ni Presidente Arroyo pinaagi sa People Power, himoa pinaagi sa malinawon nga paagi, kalma ug dili sa inisog.

* * *

Tungod sa kagubot didto sa Manila, apektado ang ubang katawhan nga malinawong nagpakabuhi. Resulta sa pagdeklarar og state of emergency mao ang kahasol.

Kon magsakay ka og sakyanan, takulahaw ka lang nga pahunongon og pakanaugon kay rekisahon sa mga polis. Kadtong mga tawo nga naghupot og lisensyadong armas ug permit to carry, did-an na sa pagdala sa ilang mga pusil. Sa ato pa nakahatag kamo og kahasol kanila. Tiaw mo P4,000 ang tuig sa permit to carry, ug tag P400 ang tuig sa high powered handgun, apan dili mapahimuslan sa mga gun holders.

Usa kini sa nadawat nako nga reklamo kagahapon gikan sa nanaghupot og lisensyadong armas.

* * *

Ang inyong mensahe, ipadala sa 0917-383-6645.