EDITORYAL - Gipangwarta ang kalamidad

Gikaingon nga ang kamanggiloy-on sa tawo mopatigbabaw atol sa kalamidad ug katalagman. Ang pagkamanggiloy-on sa tawo mopaibabaw gyud ngadto sa isigkatawo niini nga anaa sa kalisdanan.

Apan dili diay sa tanang panahon. Ang nahitabo nga landslide sa St. Bernard, So. Leyte, mipamatuod niini. Aduna say mga tawo kang kansang maitom nga kasingkasing magpabilin nga maitom bisan pa atubangan sa pagbangutan sa usa ka dapit.

Didto sa St. Bernard, suma sa among reporter nga gipada didto, adunay mga tawo nga gihimong negosyo ang kalamidad nga nahitabo. Gipangwarta.

Ang pletihan, pananglitan, sa habal-habal mipasaka sa ilang presyo gikan sa P50 matag tawo ngadto sa P250. Ang presyo usab sa mga pagkaon misaka. Usa ka gamay'ng hiwa sa tulingan tag P30 na. Ang kaon sa usa ka gamay'ng plato pag P10. Ug ang bottled water hapit di na maabot ang bili.