Pagkapukan ni Marcos

Gabii kadto sa Pebrero 25, 1986 nga si Presidente Ferdinand Marcos uban sa iyang pamilya ug pipila sa iyang mga sinaligan pinangulohan ni Gen. Fabian Ver milayas sa Malakanyang gumikan sa 'people power revolution' nga gilusad didto sa EDSA sa kaulohan.

Gidala sila sa abyon padulong sa Hawaii diin namatay siya didtong nasura kaniadtong Septiyembre 28, 1989.

Ang iyang patay'ng lawas anaa gihapon sa refrigerated crypt sa mausoleum sa pamilya diha sa Batac, Ilocos Norte.

Dinhi natapos ang politikanhong kasaysayan ni Ferdinand Marcos nga nahimong Presidente sa atong nasud kaniadtong Disyembre 30, 1965 gumikan sa pagpildi niya ni Presidente Diosdado Macapagal sa Liberal Party diin gibiyaan niya kini og 673,000 botos kapin kon kulang.

Si Marcos nahimong unang Presidente sa atong kasaysayan nga nasublian sa gahum human giparot niya si Senador Serging Osmeña Jr. sa Sugbo kaniadtong November 1969 presidential election.

Mideklarar siya og martial law kaniadtong Septiyembre 21, 1972 aron pagluwas sa atong nasud gikan sa komunismo apan ang mga tigpaniid sa politika nagkanayon nga ang katuyoan sa proclamation 1081 mao ang pagwagtang sa 1973 presidential election ug sa pagpalungtad niya sa gahom sulod sa bayente uno anyos sukad masukad wala pa mahitabo sa atong kasaysayan.

Kaniadtong Abril 1981, nahimo si Marcos nga katulo na nga giinagurahan isip Presidente sa atong nasud gumikan sa pagpildi na usab niya ni kanhi Defense Secretary Alejo Santos.

Mangutana kita: Politikanhong pagkapukan ba ni Marcos ang EDSA revolution sa Pebrero 25, 1986?

Ang tubag niini husto gyud kay gumikan sa nahisgotang revolusyon natapos ang politikanhong karera niya ug ang pagkalingkod ni Cory Aquino sa Malakanyang gikan sa Pebrero 25, 1986 hangtod sa Hunyo 30, 1992.

Mahinumduman, nagsugod siya sa iyang politikanhong karera kaniadtong November 1949 election diin napili siya isip diputado kon kongresista sa Ilocos Norte.

Usa ka utokan ug maabtikon nga politiko si Ferdinand Marcos sa atong kasaysayan apan dili siya usa ka walay puangod ug walay balatian nga diktador sa atong nasud.

Ngano man? Bisan og sibaw ug lanog na kaayo ang singgit sa mga katawhan didto sa EDSA nga moluwat na siya sa iyang katungdanan, wala gyud siya mogamit sa iyang gahum sa pagpabomba ug sa pagpamusil sa atong mga katawhan niadtong panahona nga didto sa EDSA kay dili siya gustong tawgon og ilhon nga 'Hitler sa Pilipinas' ugma damlag.

Mao kini ang usa ka maanindot nga punto pabor kang FM sa nahisgotang EDSA revolution.