Pagtarong mo uy!

Maayo unta og ang kaso ni PO2 Jaime dela Cruz makahatag og leksyon alang sa ubang polis nga naghuna-huna pa sa paghimo og binuang.

Wala g'yoy nalooy ni PO2 Dela Cruz dihang gidala siya didto sa Regional Trial Court (RTC) Criminal Division sa Palace of Justice kagahapon.

Upat ka kaso ang gipasaka sa Ombudsman kaniya, basi sa girekomendar sa National Bureau of Investigation (NBI) nga maoy nakasikop ni Dela Cruz sa akto nga nangilkil og kwarta.

Ang asawa sa tawo nga giingong dinakpan ni Dela Cruz, iya ra gong kaila sab didto sa barangay Pasil, maoy buot niya kilkilan og kwarta human gidala didto sa Campo Sotero Cabahug.

Ang asawa sa dinakpan midali intawon pag-adto sa NBI ug nagpakitabang. Abtik ang NBI nga mihimo og laang, pinaagi sa usa ka entrapment operation.

Tuod man, nadakpan g'yod nila si Dela Cruz nga midawat sa kwarta didto sa usa ka kan-anan diha sa eskena Gorordo ug General Maxilom avenue.

Unya human sa iyang pagkasikop, gisumiter siya og drug test ug namatud-an pa g'yod nga positibo siya sa gidili nga matang sa drugas.

Bisan diha na lang bahina, kamo, malooy ba kamo sa iyang gidangatan? Buyno, maisip gihapon siya nga walay sala hangtud nga kapamatud-an nga sad-an human sa husay.

Apan unta magsilbi kini nga leksyon sa mga polis. Tan-aw nako dunay mosunod kang Dela Cruz kon sila si Police Officer "D" ug Police Officer "E" magpadayon sa ilang binuang.

Kining duha ka polis managkompare diay unya magkuyogay pa sa pagpangilkil sigun sa akong informer nga ila rang kauban.

Sa ako nang giingon, wala pa ko'y tinguha nga masilotan kamong duha "D" ug "E." Apan hunong na sa inyong mga binuang.

Maoy kuhai og sanglitanan si Dela Cruz. Sigurado ko nga mataktak kini sa iyang pagka polis ug kay NBI man ang moprosecute niya, aw nahibawo na ta ug unsa kalantip ang NBI modala og kaso.

* * *

Duna ko'y nadawat nga text message niadtong miaging gabii. Mireklamo kini batok sa kapolisan diha sa Station 1, sa Mandaue City police office.



Matud sa nagpadala nako og text message nga wala tagda sa mga polis ang grabe kaayong mga video karera ug pagpamaligya og shabu diha sa dapit sa karaang ihawan sa Mandaue.

O, aksyoni ninyo kining maong reklamo mga polis diha sa Mandaue.

Alang sa akong informer, pahibaw-a ko pananglit anaa lang gihapon og wala pa tagda sa mga polis.

* * *

Kadtong polis nga gipatay didto sa barangay Dulho-Fatima kaniadtong Huwebes sa gabii, naghantak diay kuno to. Maayo ba ang iyang gihimo?

Kon polis ka gani, unya talawan ka mopatuman sa balaod kay hayan daghan ka og mga higala o kaha utro ka pang nalambigit sa mga illegal, palayo lang sa maong dapit.

Law-ay kaayo tan-awon nga sa mga dapit nga dunay illegal nga kalihukan, naa ang usa ka polis ilabi na og nagsul-ob kini og sapot nga maila ka nga tinugyanan sa balaod.

Makaingon sab ta nga vigilantes tingali ang nagpusil sa maong polis. Ang vigilantes dili ra kay batok sa mga yanong kriminal, kinahanglan nga apilon usab ang mga badlongon sa kagamhanan.

* * *

Ang mensahe ninyo, sa akong secretary lang ipadala ha. Ang iyang cell - 0917-3836645. Pwede usab nga inyong suwaton ug ipadala diri kanako.