COA vs. Yap

Gawas sa gikagubtan niyang pagkatudlo isip general manager sa Mactan-Cebu International Airport Authority (MCIAA), si Heneral Adelberto Yap gipasanginlan sab sa Commission on Audit (COA) nga utangan sa nasudnong panudlanan. Matod ni Evelyn Louise Rivera, kanhi audit team leader sa MCIAA, nibisto sa giingong ilegal nga pagkobra ni Yap og benepisyo nga nabayran na sa nasudnong gobyerno. Segun ni Rivera kaduha kuhaa ni Yap ang bayad sa iyang leave credits.

Ang gipasabot ni Rivera mao ang P130,432.08 nga gibayad sa MCIAA sa monetization sa leave credits ni Yap niadtong Hunyo 7, 2005, upat ka adlaw human siya niasumir sa katungdanan. Bugti ni sa 112 ka adlaw nga leavecredits ni Yap sa Air Transportation Office (75.334 ka adlaw) ug Clark International Airport Authority (37.08 ka adlaw). Apan nasakpan ni Rivera nga ang samang benepisyo nakobra sang Yap gikan sa Clark niadtong Hulyo 1, 2005, usa ka buwan human niya kuhaa ang tseke gikan sa MCIAA.

* * *

Sa iyang suwat ngadtong Yap niadtong Septiyembre 22, 2005, si Rivera nipasabot sa ubang sukaranan nganong gideklarar niyang ilegal ang pagkobra ni Yap sa dakong kuwarta:

o Ang iyang leave credits sa ATO di na mabalhin sa MCIAA kay nilapas na sa gitakda sa balaod nga usa ka tuig nga lugway pagbalhin sa benepisyo ngadto sa bag-ong ahensiya, nibiya siya sa LTO niadto pang Septiyembre 23, 2003 ug natudlo sa MCIAA Board niadto nang pagka Pebrero 22, 2005;

o Ang iyang leave credits sa Clark mabalhin lang sa MCIAA kon way bugto ang iyang pag-alagad, apan duha ka buwan ang kang-a gikan sa pagbiya ni Yap sa Clark (Disyembre 6, 2004) ug sa iyang pagbalhin sa MCIAA (Pebrero 22, 2005); ug

o Napakyas si Yap pagpakita og dokumento nga magmatuod nga nabalhin ang benepisyong iyang ginakobra gikan sa ATO ug Clark ngadto sa MCIAA.

* * *

Giawhag usab ni Rivera ang mga opisyal sa Human Resource Management Division ug Accounting Division sa MCIAA pagtarung pagpatuman sa mga lagda aron nga di na sila malutsan og kadudahang gasto. Wa hinuon klaroha ni Rivera kon inosente bang ilang kasaypanan, o tungod ba sa ilang kaikog o gihudlat ba gyod silang Yap, o nakigkonsabo gyod sila sa nangalisbo nga palusot.

Si Yap gitagalan ni Rivera og hangtod niadtong Septiyembre 28, 2005 pagpatin-aw sa nasakpan nga kahiwian. Kasaligang tinubdan nitug-an nga wa magtagad si Yap pagtubag ni Rivera. Hangtod nga nakugang na lang ang kadaghanan dihang ilang nahibaw-an nga gitangtang na si Rivera gikan sa MCIAA. Gamhanan na ba gyod kaayong mga padrino ni Yap nga, gawas nga iyang nalutsan ang Civil Service Commission ug gilugpitan mora'g kiko ang mga sakop sa MCIAA Board, hastang COA di nang kahikap niya?

* * *

Email: [email protected]