Dayo'g dupa

Inay nga molaban sa pari nga gipasanginlang nanglugos og usa ka batan-ong babaye didto sa dakbayan sa Danao, angayang ipakita sa kadagkuan sa Simbahang Katoliko dinhi sa Sugbo nga seryoso sila sa kampanya batok sa immoralidad pinaagi sa paghimo og ilang kaugalingong imbistigasyon.

Di husto ang gihimo sa mga opisyal sa Archdiocese of Cebu nga mipakita dayon og paglaban ni Fr. Jose Belciña ang kura paroko sa Maslog, Danao City. Si Msgr. Achilles Dakay ang tigpamaba sa Archdiocese mitug-an pa atol sa interview sa media nga ilang hatagan og abogado ang pari aron kuno pagtabang nga matugkad ang tinuod.

Ang paghatag og abogado usa kini ka lakang pagtabang sa pari nga giakusahang nanglugos sa iyang "scholar". Kon kamatuoran maoy gusto sa simbahan nganong di man sila mohimo og ilang kaugalingong imbistigasyon batok sa pari inay nga hatagan og abogado aron pagpanalipod sa iyang kaugalingon.

Kon moralidad ang hisgutan diin ang simbahan maoy numero unong atong gisaligan sa pagtudlo niini, wa masubay sa moralidad ang ilang pagtabang sa pari nga gipasanginlang nanglugos. Tinuod wa pa mamatud-ing sad-an si Belciña, pero wa sab ni nagpasabot nga namakak ang minor de edad nga mireklamo.

Busa ang angayang buhaton sa kadagkuan sa simbahan mao ang pagpaabot sa resulta sa kaso o di ba kaha mohimo sila'g administrative investigation batok sa pari. Ayaw nala'g linglaha ang publiko pinaagi sa pagpatuo nga kamatuoran ang gusto sa kadagkuan sa simbahan maong hatagan nila og abogado si Belciña.

Wa malilong sa publiko nga hilig kaayong tapin-an sa simbahan ang ilang mga sakop nga mapasanginlang nakahimo og sayop. Di ni maoy unang higayon nga gipakita sa simbahan ang ilang paglaban. Suma sa mga naunang kaso nga naglambigit gihapon og mga pari nga giakusahang mimolestiya sa mga altar boys.

Laing prueba nga milaban ang simbahan sa ilang sakop nga giakusahang nakahimo og krimin mao ang pamahayag ni Dakay nga daw sa mibasol hinuon sa biktima nganong magpunay kuno og adto sa kumbinto.

Basin og nakalimot si Dakay nga simbahan intawon na ang gipuy-an sa pari, busa di nimo kapugngan kon dunay mga tawo nga magpunay og anha. Pero bisan og tugotan ta nga kwestiyonabli ang pagpunay og adto sa biktima sa kombento, bisan pa gani tugotan ta nga ang babaye maoy nagpakita og motibo ngadto sa pari, rason naba kini nga iyang lugoson?

Di man siguro angayang pahinumduman si Msgr. Dakay nga duna silay "vow of celibacy" nga gitamod ug ang pagpakighilawas sa usa ka babaye kon dili sila kasado labi pa sa usa ka pari dakong sayop sa doktrina sa simbahang Katoliko.

Si Belciña mao unta to'y angayan nga mibadlong sa babaye kon ugaling mao niy nanguna ngadto niya. Di makapaabot si Dakay nga ang babaye'ng nangangkong biktima ni Belciña maoy motudlo sa pari og unsay husto ug di husto.

Wa sab ko kakita og rason nganong magpakauwaw ang biktima og pasaka og kaso batok sa pari kon di tinuod ang iyang pasangil. Dunay nag-ingon nga posibling politika ang hinungdan niini kay matud pa ang pari dakong supak nga himoong common dumpsite ang Maslog.

Pastilan, ingon na ba gyud niana ka buang ang nangangkong biktima nga magpaka-uwaw sa iyang kaugalingon ug mosakripisyo sa iyang kaugmaon aron lang pagbutang butang og sayop sa pari? Ayaw'g kalimot nga ang biktima gigastohan sa iyang pag-eskwela sa pari, busa kon duna man gani'y gamiton sa politika pagguba sa pari, ang biktima maoy katapusang tawo nga mosugot niini.

* * *

[email protected]