Biktima sa politika

Naghinayhinay na sa pagpanggawas gikan sa ilang mga lungag ang mga miyembro sa fraternity nga adunay nag-ung-ong nga kasong kriminal sa korte.

Duha kanila, sukad pagsulat ning lindog, ang misurender sa mga awtoridad.

Una niini niadtong miaging Huwebes sa dihang si Glen Codiñera nga miyembro sa Tau Gamma Phi mitahan sa iyang kaugalingon.

Ikaduha si Warren Entera, laing Tau Gamma Phi member, nga mitahan sa sama nga team nga mi-pik-ap kang Codiñera.

Mao kini silang duha ang gika-intapan sa ilang grupo. Pulos adunay mga warrant of arrest nga giisyu sa korte alang sa ilang pagdakop.

Wala pa gyuy sakop sa kaatbang niining grupo nga Alpha Kappa Rho nga mitahan sa kaugalingon. Ngano kaha? Basin og gibarugan ra gyud nila ang kaisog o wala ba kaha motuo sa ka-"epektibo" sa reward system nga gisagop ni Mayor Tomas Osmeña pagsipong sa mga badlungong fratmen.

Magpaabot lang hinuon kita. Tingale, kadtong mga sakop sa Akrho nga adunay mga warrant of arrest mogawas ra sa ilang gipangtaguan og motahan ngadto sa balaod.

* * *

REWARD. Motuo baya ko niining reward system.

Adunay kini mga bintaha nga angayang ikonsiderar alang sa pagpapaspas sa proseso.

Sama pananglit sa programa ni Tomas nga paglimpyo sa dakbayan sa Sugbo batok sa kagubot mugna sa nagkalainlaing fraternity, dili mahitabong motahan sa kaugalingon kun wala pay salapi nga reward nga gipagawas ang kagamhanan sa dakbayan aron ipatong sa tagsatagsa nila ka ulo.

Ang reward system nahimo nang tipik ug kabahin sa sistema sa hustisya sa nasud nga Pilipinas. Nakatabang kini sa kapolisan sa paggukod niadtong mga tawong nakahimo og dagkong krimen.

Ang reward maoy makaaghat sa mga pribadong indibidwal sa pag-apil-apil sa proseso. Ang reward maoy magsilbeng "motivation" alang kanila nga motuyo pagsumbong sa mga awtoridad ug pagtudlo sa gilubloban sa mga wanted nga kriminal.

Hinuon, kun adunay bintaha, aduna usab kini dautang ikadulot sa proseso mismo.

Ang reward system maoy makatapulan sa mga tinugyanan sa balaod.

Dili sila molihok kun walay tugbang nga premyo.

Butang kini nga nakamantsa sa proseso.

Sila man unta ang gitugyanan sa komunidad sa trabaho pagsikop sa mga kriminal.

Apan dili na sila makahimo sa trabaho ug maglisud na sila sa pagtuman sa ilang gipanumpaang tahas.

Dili ko moingong wad-on ang reward system.

Ang ako lang, nga bisan walay reward nga gitagana, angayan silang molihok ug motuman sa ilang trabaho pagsikop sa mga tawong gilutsan og warrant sa korte.

Itisok unta sa mga polis nga bisan walay reward trabaho nila ang pag-imbestigar sa gikahimutangan sa mga frat members, pagsunod sa ilang mga lihok ug mga lakaw, ug pagdakop nila kun makahigayon.

Dugay na nga nangalutsan og warrant ang mga miyembro sa lainlaing fraternity, apan hangtod wala mobungat si Tomas pilay patong sa matag ulo, wala gyuy nasikop.

Misurender na lang ang duha ka miyembro sa Tau Gamma kay nahadlok basin og mataymingan ug menteryo inay prisohan ilang padulngan.

* * *

POLITIKA. Akoy naluoy ni Fr. Jose "Joey" Belciña sa mga pasangil nga nang-rape siya og scholar sa iyang parokya.

Nagtuo gyud ko nga 'politika' ang hinungdan nganong giakusahan si Fr. Joey og ingon kabinuang nga pasangil.

Si Fr. Joey man gud gusto nga mapapahawa sa mga opisyal sa Danao tungod kay kini maoy nangulo sa signature campaign aron supakon ang plano sa kagamhanan sa Danao ug probinsiya sa Sugbo nga mohimo og sanitary landfill sa barangay Maslog diin mahisakop ang Parokya ni San Francisco de Asis nga iyang gialagaran isip kura paroko.

Tiaw mo kana. Ang mga tawong anaa sa gahum ang kontra ni Fr. Joey. Mao kini nagtukmod kanako sa pagtuo nga si Fr. Joey biktima sa politika.

Walay laing tawong kadangpan ang mga residente sa barangay Maslog aron maoy modala sa ilang tingog pagsupak sa sanitary landfill project nga nahunahunaang anha ibutang sa ilang tugkaran, gawas ni Fr. Joey.

Landfill gud na, siyempre baho ug walay buang nga residente ang mosugot niini. Magdala pa gyud kini og sakit ngadto kanila.

Mahimo sa mga kontra ni Fr. Joey ang pagmaniobra og kaso aron lang siya mapapahawa sa iyang parokya ug aron wala nay babag sa laraw nilang pagtukod og basurahan sa Maslog.

Si Fr. Joey, sumala pa sa akong nahibaw-an, gi-operahan sa miaging tuig tungod sa pagkabali sa iyang bitiis (wala ko masayod kun wala ba o tuo) tungod sa dula nga basketbol sa kaubanan niyang kaparian.

Unya, ang babayeng mipasangil nga gilugos siya sa pari, miingon nga katapusan nga higayon nga gihilabtan siya niadtong Disyembre 25, atol sa Christmas party.

Bali man kaha ang tiil ni Fr. Joey? Makahimo pa diay siya pagpanghilabot sa babayeng walay depekto sa lawas?

Mao kini tan-awon sa publiko. Kun wala ba maniobraha sa mga awtoridad ang pagpatim-aw sa scholar aron pit-on si Fr. Joey tungod sa iyang paggamit sa pulpito pagsupak sa sanitary landfill nga tukoron sa barangay nga gitarukan sa iyang parokya.

Wala ko moingong walay sala si Fr. Joey. Trabaho sa korte ang pagdeterminar sa sala o ka-walay sala sa tawo.

Hangtod wala koy nakit-an nga hinungdan nga himuon sa pari ang gipasangil sa iyang scholar, dili ko motuo nga nahitabo kini.

Hala, kamong mga taga-Maslog, bantayi ninyo ang lihok nianang scholar. Bantayi usab ninyo ang posibleng maniobra sa piskal ug kapolisan.