Na nagpapalubha sa maraming dusa;
Tulad ng nangyari pagpunta sa ULTRA
Maraming nasaktan at namatay pa nga!
Sa dami ng taong doon ay dumating
Naturang trahedya di kayang pigilin
Matanda at bata doo’y nagupiling
Nang ang mga tao’y nagmistulang lasing!
Sa pag-uunahang pumasok ng ULTRA
Nawalang hinahon ang bata’t matanda;
May mga naipit ang iba’y nasipa
Maraming namatay — napisak sa lupa!
Mga mamamayang doo’y nagtitipon
Sarili na lamang ang inisip noon;
Ang mga katabi’y hindi pinaurong
At kahi’t higa na’y walang nagbabangon!
Sa hangad makuha yaong kagustuhan
Kahi’t makasakit walang pakialam;
Ang ugaling ito nitong sambayanan
Ang siyang nagdulot ng kapahamakan!
Taong malalakas at ugaling tuso
Tuloy sa pagtulak, tuloy sa pagtakbo;
Ang mga matanda’t may mura pang buto
Nabulid sa lupa na basag ang bungo!
Dapat ang naghari ay pagmamahalan
Saka malasakit sa kapwa’t kabayan;
Kung hindi ganito’y maraming lilisan
Sapagka’t berdugo’y itong sambayanan!
Ang hindi maganda sa nangyaring ito
Nasabing trahedya ay ngayong Pebrero;
At ang Valentine’s Day nalimot ng tao
Sapagka’t maraming nawalan ng puso!