Masumpo ba ang pangurakot sa gobiyerno?

Dili pa lang dugay, namantala sa mga peryodiko nga ang Pilipinas usa sa mga pinakakurakot nga nasud sa tibuok kalibotan.

Sa atong gobiyerno, ang nanghawod sa pagkakurakot mao ang DPWH, DepEd, BIR, Bureau of Customs, PNP, AFP ug ang ubang mga lokal nga buhatan sa atong kapupud-an.

Ang pangurakot pagahimoon diha sa mga 'ghost employees' 'ghost projects, overpricing ug sa malversation of public funds.

Gani, daghan nang mga opisyales, huwes, fiscal ug kawani sa atong gobiyerno ang nangatangtang na sa serbisyo gumikan lang sa pangurakot diin ang nasakiyo nila mikabat og minilyon ka pesos sa atong panudlanan.

Ang pangutana karon mao kini: Masumpo ba ang mga pangurakot sa buhatan sa atong kagamhanan? Hustong tubag niini mao nga dili masayon ang pagsumpo sa pangurakot sa atong kagamhanan gumikan ning mosunod nga mga katarungan.

Una, ang suweldo sa mga kawani sa gobiyerno wala gyud moumento sukad pa sa tuig 2001 hangtod karon apan ang presyo sa mga palaliton misulbong taman sa ginhawa ngadto sa kapunawpunawa sama sa gas, manteka, isda, gatas, asukar, matrikula ug gasolina.

Wala karon mabalansi ang pagpuyo sa atong mga katawhan ubos sa pamunoan ni ekonomista Gloria Macapagal Arroyo.

Ikaduha, gumikan sa kamahal sa mga palaliton ug walay umento ang suweldo hataas kaayo ang lanat sa tentasyon sa pangurakot karong panahona. Mangurakot man gani ang mga opisyales nato ang mga yanong kawani ba hinoon.

Ikatulo, masumpo o maminos-minosan ang pangurakot kon usbawan sa husto ang suweldo sa atong mga empleyado, mamumuo ug mga kawani aron makalingkawas kitang mga pordoy gikan sa ekonomikanhong krisis ug kalisdanan nga mikuso-kuso ug midagmal kanato sa atong inadlaw-adlaw'ng panginabuhi.

Masumpo usab ang pangurakot kon ang atong mga opisyales magbantay sa kanunay sa ilang mga lakang gikan sa mga mata sa publiko kon 'Watch your step in public' sigon pa ni anhing Presidente Ramon Magsaysay.