Angie Reyes okay sa DENR

NAGPATUPAD ng rigodon ang Malacañang sa gabi-nete. Nahirang si DILG Secretary Angelo Reyes na kalihim ng Department of Environment and Natural Resources (DENR) kapalit ng kontrobersyal na si Michael Defensor. Sana, kung gaano ka-epektibo si Reyes sa pagpuksa sa mga kidnappers, carnappers at smugglers, isang gawaing sinubaybayan niya kahit nung siya’y maging DILG Secretary na, ganyan din siya maging kaagresibo laban sa lahat ng sumasalahula sa kapaligiran.

Dapat asikasuhin ni Reyes ang pagbuhay sa naghihingalong mining industry. Mainam iyan sa pagpapasigla ng ekonomiya porke ang bansa natin ay sagana sa mga valuable minerals tulad ng ginto na alam naman nating sandigan ng pananalapi ng bawat bansa sa mundo.

May military discipline si Reyes na ipinakita niya kahit sa paghawak ng mga sibilyang gawain. Kaya ang pag-appoint ng Pangulo kay Reyes ay patunay sa pagpapahalaga ng pamahalaan sa pangangalaga ng kalikasan at pagpapalakas ng sektor ng pagmimina.

Gaya nang nasabi na natin, iyan ang isang bagay na dapat pagtuunang pansin ni Reyes. Minsan nang nanguna sa Asia ang Pilipinas sa larangan ng pagmimina at dapat i-ahon ang industriyang ito dahil malaking bentahe sa pagpapasigla ng ekonomiya.

Hindi lang organizational at management skill ang taglay ni Reyes. Subok ang kakayahan niya sa law enforcement. Bago maging DILG Secretary, siya’y hepe ng Hukbong Sandatahang Lakas ng Pilipinas at namuno sa iba’t ibang task forces laban sa kriminalidad.

Sa kanyang paglisan sa DILG, pinalitan siya ni Ronaldo Puno. Sana nama’y hindi mawindang ang operasyon ng DILG at maipagpatuloy ni Puno ang epektibong operasyon nito.

Angkop ang estilo ng pamumuno ni Reyes saan man dalhin, lalo na sa DENR. Marunong siyang makinig sa bawat sektor sa pagresolba ng mga problema.

Tiyak na magiging epektibo siya sa pagresolba sa problema ng sektor sa pagmimina gayundin sa problema sa illegal logging na malaon nang suliranin ng bansa.