Lit-ag ni Loot

Sumsoman karon sa mga estorya ug "kabalaka" ang plano nga pagpa-accredit sa mga importer og sakyanan ngadto sa Department of Trade and Industry.

Ang accreditation itumong aron legal na nga maka-convert sa ilang ipang-import nga mga right hand drive (RHD) nga mga sakyanan ngadto sa pagka-left hand drive (LHD) ang mga importer niini.

Ang RHD wala itugot sa balaod nga i-import dinhi sa nasud ug mao kini gituohang hinungdan nga misaka ang kaso sa smuggling sa mga puwerto sa nasud, apil na ang Cebu, tungod kay magtagotago man og payuhot og mga RHD nga sakyanan ang mga importer pagtuman sa ilang negosyo.

Kun mahinayon ang accreditation, dili isyuhan og certificate of payment (CP) ug i-release sa Bureau of Customs ang mga gi-import nga RHD nga sakyanan kun wala ma-convert sa pagka-LHD.

Apan nakasugat og dili maayong reaksiyon ang laraw pagpa-accredit sa mga importer og sakyanan.

Gikareklamohan sa pipila ka mga importer nga estrikto ang monitoring sa DTI unya ngadto sa mga accredited nga mga shop.

Bisan ang gamay nga 'specification' sa pag-convert sa mga RHD ngadto sa pagka-LHD kinahanglan na nga sundon sa mga accredited nga shop aron makapasar sa standard.

Unya, kini nga standard dili basta-bastahan tungod kay mao kini ang standard nga gisunod sa mga dagkong manufacturer og mga sakyanan nga maoy kusog kaayong nanghilak sa naghitak nga smuggling og RHD sa nasud.

Siyempre, ikomparar nato ang mga accredited nga shop sa mga importer kumingking ra sa mga dagkong car manufacturers. Pildehon gihapon sila.

Ang akong pangutana, makatabang ba sa koleksiyon sa Port of Cebu ang pagpa-accredit sa mga importer?

Gikuyawan man gud ko og i-boykot ang maong laraw. Wala na hinuoy mo-import. Siyempre, kun walay mo-import tikyaob ang koleksiyon sa customs.

Apan kun tan-aw sa liderato sa adwana nga makatabang sa koleksiyon ang pag-accredit sa mga importer, aw, maayong ipatuman kining maong plano dili lang kay sa Port of Cebu kun dili sa tibuok nasud.

* * *

MGA KARSADA. Maayong susihon sa City Traffic Operations and Management ang eskina P. del Rosario ug Osmeña Boulevard, atubangan nga bahin sa Land Bank of the Philippines.

Mura'g wala na gyud magamit ang karsada paliko gikan sa Osmeña Boulevard demano paingong P. del Rosario tungod kay kanunay'ng gialihan sa mga PUJ nga nagbiyahean og Guadalupe, Banawa, Martinez, Singson ug Ayala.

Sa akong nasabtan, gibuksan ang maong dalan aron kadtong mga sakyanan nga nagsubay sa Osmeña Boulevard unya moliko aron mosubay sa dalan P. del Rosario paingong demano pa-amihanan, anha mogamit sa maong nag-eskina nga dalan. Kun mao kini, kadtong moderetso sa Osmeña Boulevard, kinahanglang magpatunga unya kadtong modemano paingong Sto. Rosario church, kinahanglang magpadaplin.

Pero dayag kaayong wala na masunod ang maong paagi. Hilabihang daghanang mga PUJ nga magdasok atubangan sa Land Bank. Ang resulta, kadtong modemano maalihan sa mga PUJ.

Mao usab kining sitwasyona sa eskina Legaspi ug Colon, atubangan sa Cinerama, daghang mga PUJ nga may biyaheng Lahug nga moali atubangan sa Jollibee-Colonade, busa kadtong mga sakyanan nga gustong modemano paingong Colon gikan sa Legaspi, dugay kaayong makalusot.

Dili man nato mamahay ang mga PUJ drayber nga mobuhat sa ingon. Ang Citom maoy angay mabasol niini tungod kay hilabihang kalayo sa gipang-destino nila nga hunonganan aron kanaogan sa mga pasahero.

Mapugos og hunong ang mga PUJ tungod kay adunay manakayay sa mga lugar nga akong gihisgutan sa unahan.

Sama diha atubangan sa Land Bank, ang jeepney stop tua pa sa unahan, atubangan sa luna sa kanhi SSS, ug ang sunod tua na atubangan sa Bangko Sentral. Magbaklay pa ang mga pasahero.

Kinsay drayber nga dili maluoy sa mga pasahero nianang sitwasyona?

* * *

PINIRMAHAY. Nanghagit kagahapon si Cebu Provincial Police chief Supt. Vicente Loot ngadto ni kanhi Kongresista Celestino Martinez Jr. nga tapokon ang tanang mga opisyal -- gikan sa mayor ngadto na sa mga kapitan sa barangay - sa kuwatro distrito aron magpinirmahay sila og kasabutan nga walay usa sa ilang pamilya nga modagan sa sunod nga eleksiyon.

Gibuhian ni Loot ang maong hagit tungod sa pasangil sa mga Martinez nga ang pagpatim-aw karon ni Joel Sumabong nga naglambigit ni Bogo Mayor Celestino "Tining" Martinez III nga maoy utok sa tulis sa Land Bank sa Bogo, tungod sa politika ug nga ang pamilyang Loot maoy nagpaluyo niini.

Maayo pa hinuon!

Pero nagduda ko nga dili mosakay ang mga Martinez sa lit-ag ni Loot.

Parehong pamilyang politiko ang mga Loot ug Martinez nga nag-ilog sa balwarte -- ang kuwatro distrito. Busa, unsay lakang nga makab-ot sa mga Loot ug sa mga Martinez dili gyud kasaligan.

Ang kasabutan, bisan ilang pirmahan atubangan sa Santo Papa, mahimo gihapon nilang ibasura ini'g abot sa oras, kay sa ako nang gikaingon, pulos sila mga politiko.

Ang maayo nilang mga Martinez ug Loot maghilom na lang.

Bisan unsaon og pangulipas ni Supt. Loot nga wala ug nungka nga magpagamit siya sa mga Garcia, dili gyud na tuohan sa mga Sugboanon tungod kay bisan kanus-a magpabilin ang mga samad nga gibilin sa miaging eleksiyon, mga samad kana bunga sa politika nga maoy dakong hinungdan sa panagbulag sa dalan sa mga Garcia ug Martinez.

Dili mahikalimtan sa mga Martinez ang dakong kaparatuan ni Junie sa miaging duha ka eleksiyon nga milabay. Midagan si Junie sa 2001 nga eleksiyon tandem ni Pabling Garcia, apan napilde ngadto ni John-John Osmeña. Sukad niadto, nagkabulag ang dalan ni Pabling ug Junnie. Gisulayan og sungag ni Junnie ang mga Garcia sa miaging 2004 nga eleksiyon, giatbangan niya si Gwendolyn, apan ang iyang tandem nga si Greg Sanchez ang midaog.

Si Sanchez, pipila gyud ka bulan human sa eleksiyon, distansiya kaayo sa mga Garcia. Mibilib gani ko kay daw may prinsipyo siya ug wala mobulag sa kawsa sa mga Martinez. Apan wala magdugay milubad ra si Greg, giwani ang mga Martinez ug karon daw hadlok nga mosungag ni Gwendolyn.

Unya, ang mga Loot kaalyado sa mga Garcia. Gani, dako og natabang si Gwendolyn sa pagkabutang ni Loot diha sa provincial police office.

Kinsay Junnie nga mosulod sa lit-ag ni Loot?