Kamatayon diha sa pangindahay

Way mabasol sa kamatayon sa kapin 70 ka mga tawo ug pagkaangol sa kapin sa 200 atol sa "stampede" didto sa kaulohan niadtong Sabado kon dili ang kawad-on ug ang padayong kapakyas sa atong gobyerno pagtubag sa maong problema.

Daw sa gihiwa ang akong dughan nga nagtan-aw sa liboan ka mga tawo nga nagtukaw ug naglinya sud sa pipila na ka adlaw uban ang pangindahay nga makasalmot ug kahatagan sa kahigayonan nga masakmit ang dagkong ganti nga ipanghatag sa usa ka sikat nga television show sa higanting network sa nasud.

Sagad sa mga naglinya didto sa Ultra Center sa Quezon City gikan pa intawon sa lagyo nga mga probinsiya ug mituyo lang sa pag-adto sa pamasin nga makasud ug makaangkon og ganti. Ang kalisod sa panginabuhi ug ang kawad-on maoy nagtukmod sa maong mga tawo aron molinya ug mag-antos sa uwan ug init uban sa way kasiguroan nga pangandoy.

Ang paningkamot nga makasud sa Ultra maoy hinungdan sa kaguliyang nga miresulta na hinuon sa kamatayon sa daghang mga tawo ug sa pagkaangol sa kapin sa 200. Sigurado ko nga kon natubag pa sa atong gobyerno ang kalisod dili ingon niadto kadaghan ang mga tawo nga maglinya ug siguro wa untay mga kinabuhi nga nakalas.

Pasaylo-a, nga di lang gyud malikayan nga mobanda sa ka-inutil sa atong gobyerno ang mga trahedya nga ingon niini bisan kon way bulok politika ang mga panghitabo. Bisan tingali di masayon sa atong gobyerno pagsulbad ang problema sa kawad-on apan malikayan unta tingali ang pagmahay sa publiko kon nakita pa ang sinsiridad sa atong mga opisyal pagsulbad niini.

Apan di kini ang hulagway nga nakita sa publiko kay samtang nag-ila-id sa kalisod ug sa kawad-on ang mayoriya sa mga Pilipino, minilyon ka pisos sa pundo sa gobyerno ang atong madunggan nga giusik-usikan sa atong mga opisyal sa way klaro nga mga proyekto.

Pananglitan ang P400 milyones kapin nga gigahin sa gobyerno alang sa pagpamalit og mga abuno nga kunohay i-apod-apod ngadto sa mga mag-uuma. Apan unsay nahitabo, naputos sa anomaliya ang maong proyekto kay gawas nga di ni maoy labing gikinahanglan sa katawhan sa pagkakaron kwestiyonable pa gyud ang pagpatuman niini.

Wa pangayoa ang maong proyekto apan gipamugos kini sa nasudnong kagamhanan. Kon dunay mas labaw'ng nasayod sa proyekto nga gikinahanglan sa usa ka dapit way lain ang mga lokal nga opisyal ug dili ang mga opisyal nga tua sa Manila.

Ang nahitabo nanghatag og abono sa mga mag-uuma nga wa gyud mapusli kon duna man gani'y nakapahimus pipila lang. Pananglitan dinhi sa dakbayan sa Sugbo gihatagan og P3 milyones si kongresista Antonio Cuenco alang kuno sa hybrid rice commercialization program nga wa may nananum og humay dinhi sa dakbayan.

Gawas ni Cuenco si kongresista Antonio Yapha gihatagan sab niini diin klarong anomaloso ang pagpatuman tungod kay ang usa ka foundation nga gidumala sa iyang mga paryente ug kawani maoy nipatuman sa proyekto.

Kon gigamit pa sa mas klaro ug mapuslanong programa alang sa mga kabus ang maong pundo dako unta kini og gikatabang sa mga kabus.

* * *

[email protected]