Ang kurakot nga inhenyero

Fr. Bel San Luis, SVD

Adunay usa ka inhenyero ang nagpabusdik pag-ayo sa iyang kaugalingon pinaagi sa pagpanikas og pangurakot. Gamiton niya ang mga dili maayo nga mga materyales sa bisan unsa nga iyang tukoron. Usa ka adlaw niana, gitahasan siya sa presidente sa kompanya nga iyang gialagaran nga motukod og usa ka mansiyon. Nalipay ang maong inhenyero sanglit, alang kaniya usa kini ka kahigayonan nga makakobra siya'g dako alang sa iyang kaugalingon. Total, hapit naman siya mo-retiro. Tuod man nahuman niya ang usa ka maanindot og eleganteng mansiyon. Makahatag kini og dakong pagtagad ni bisan kinsa nga makakita niini. Apan ang wala lang mahibaw-i sa kadaghanan, huyang diay ang maong mansiyon. Mahimo kining malusno kon ugaling adunay hinay nga linog. Tungod kay dili maayo og huyang ang mga materyales nga gigamit niini.

Usa usa ka salu-salo, nga gitambongan sa inhenyero og sa iyang mga kaubanan sa kompanya, gisibya sa presidente ang usa ka mahinungdanong pahibalo: "Nga ang mansiyon nga gitukod sa inhenyero mao diay ang ilang sorpresang gasa ngadto kaniya sa dili pa siya mo-retiro!"

Pamalandong

Kon unsa ang imong gitanom, mao pud ang imong anihon. Ang bisan unsa nga dautang binuhatan, mobalik ra gyud sa hingtungdan.