Pro-Life Sunday

Ang Dios Miingon...
Pamalandong matag Domingo
Pebrero 5, 2006; Ikalimang Domingo sulod sa tuig
Mga Pagbasa: Jb. 7:1-4,6-7/1 Cor. 9:16-19, 22-23/Mk. 1:29-39

Dili baya lalim kon usa nato ang masakit. Mahimong ikaw dili duolon bisan sa imong mga kabanay tungod sa imong sakit, labina kon kini mananakod. Lainon ang imong mga gamit ug nga mag-inusara ka. Gani, ang uban tungod sa maong pag-antus makamahay sa Ginoo maingon nga ang mugna ni Victor Frankeinstein nagmahay kaniya tungod sa gidangatan niini. Nagmahay kini kon nganong gimugna pa siya og gihatagan og kinabuhi. (Aron mas matataw ninyo ang sugilanon palihog basaha ang nobela ni Mary Shelley nga nag-ulohan og Frankenstein). Ug tungod lagi sa maong balatian bisan asa na lang ang tawo modangop tuyo niya ang kahupayan.

Sa kapanahonan ni Jesus dili lalim ang magpaalig-alig nga manambal kay mahimong masilotan ka sa kamatayon kon ugaling ang imong pasyente dili maayo. (cf. John Pilch. The Cultural World of Jesus Sunday by Sunday-Year B, p. 32). Hinuon sa maong kapanahonan, adunay mga folk healers nga arisgado gayud nga motambal og daghan sa mga katawhan labina mga saop ang moduol aron ilang tabangan. Ug usa sa mga gimbuhaton ni Jesus diha sa iyang ministeryo mao man ang pagpanambal. Mao nga sa atong Ebanghelyo karon giayo ni Jesus ang ugangan ni Pedro pinaagi sa paghikap niini. Usa ka tabunok nga simbolismo ang paghikap. Nagkahulogan kini og pagka-andam nga "molambigit" ngadto sa uban sa paagi nga mas personal og suod.

Tinuod daghan kanato ang maisogon kaayong 'manumpa' nga moduyog sa kasakit nga giantus sa uban. Nga usahay ang maong mga panumpa nahimong mga sulti-sulti o kaha ideyalismo lamang nga wala makatugpa diha sa paagi nga mas masabtan og masinati nila nga nag-antus. Kon mohatag man gani og kahupayan, walay gugma nga napataban. Mao nga angayang tidluman ta ang gibuhat ni Jesus ngadto sa ugangan ni Pedro og sa lain pang mga masakiton. Nga diha diay sa pag-antus wala kita mag-inusara. Anaa ang Dios uban kanato ug gikugos kita niya sa tumang kalumo ug gugma.