Si Heneral Adelberto Yap, ang kontrobersiyal nga general manager sa Mactan Cebu International Airport Authority (MCIAA), wa motarung pagtubag dihang akong gipangutana atol sa "Arangkada" sa DYAB Abante Bisaya gahapon kon siya bay naglawog sa Civil Service Commission (CSC) sa sayop nga probisyon sa Republic Act 6958 nga maoy gibasehan sa desisyon ni CSC Commissioner J. Waldemar V. Valmores nga nagtugot sa pagpabilin ni Yap sa katungdanan bisan wa siya maghupot sa gikinahanglan nga Career Executive Service Officer (CESO) eligibility.
Nagpa-goryo-goryo lang hinuon si Yap nga igo rang gipatigbabaw sa MCIAA Board, ang labing taas nga ahensiya nga nag-umol sa mga lagda sa pagduma sa tugpahanan, ang tradisyon nga way general manager nga matudlo kon way nominasyon gikan sa presidente. Kay way bisan usa sa mga tagduma nga iyang gisundan-silang Antonio Oppus, Benito Diamos, Alfonso Alerre ug Angel Verdan-nga nakalingkod nga wa kadawat og nominasyon gikan sa presidente.
Angayng tambagan si Yap nga di mahimong ipatigbabaw ang tradisyon batok sa balaod. Ang balaod nagmando nga ang katungdanan ni Yap nagkinahanglan og CESO 3 eligibility ug ang kamatuoran mao nga wa siya ini. Sa ato pa, bisan pila pa ka nominasyon ang itangkil ni Yap, di siya mahimong banhawon sa MCIAA Board ang ilang karaang atraso pinaagi sa pag-ulog-ulog niya pagpabilin sa puwesto.
Kay ila na ning gihimo ni Verdan niadto. Gisubli-subli nila paglab-as ang pagtudlo ni Verdan bisan wa sab siyay eligibility tungod lang kay duna siyay nominasyon sa presidente. Pero ang CSC niinsistir nga ilegal ang pagpabilin ni Verdan sa katungdanan. Maong bisan kon ang mayoriya sa MCIAA Board didto kapusta ni Verdan, kinsa gipaluyohan sa grupo sa mga negosyante sa Sugbo nga kabihan kagamhanan kay duol sa luwag sa Malakanyang, napugos sila pagtangtang ni Verdan.
Nganong nilikoy man ang CSC sa kaso ni Yap? Nailad ba lang sila sa pagbuot-buot og sumpay sa Section 7(b) sa RA 6958 nga naghimo na sa nominasyon sa presidente nga "condition sine qua non" sa pagtudlo sa general manager? O hastang CSC nasuwawan sa giingong way pupanaganang pagpaningil ni Yap sa bayad sa labing mga opisyal sa nagkalainlaing mga ahensiya nga nakautang niyag kabubut-on niadtong sikit pa siyang kanhi presidente Corazon Aquino sa Malakanyang?
Ang pangangkon sab sa CSC nga way laing qualified sa katungdanan ni Yap gilantugi sa ubang mga aplikante sa puwesto-silang Paul Nigel Villarete, tagduma sa South Reclamation Project (SRP); Ahmed Cuizon, tigpamaba sa MCIAA; Marcelino Cordova, assistant general manager sa MCIAA; ug Ildefonso Lazaro, department manager sa MCIAA.
Di kaha maayo nga inay duphan si Yap sugdan na sa CSC ang makuting imbestigasyon pag-ila kinsay nagsud nila sa bolsa?
Email:
leo_lastimosa@abs-cbn.com