Laing sumbong vs text scam

Tungod lagi kay nauso karon pag-ayo ang pangilad pinaagi sa text kun text scam, kanunay gayod bahaon sa daghang text messages ang akong cellphone sa higayon nga makahisgot ko dinhi sa akong lindog bahin niining maong tinonto. Ang text dili mohubas sulod sa usa lang ka adlaw. Molunop pa kini sa akong cellphone hangtod sa sunod nga adlaw.

Kini maoy buhing timailhan nga labihan na gayod kadaghan ang atong kaigsuonan nga nabiktima niining maong tinonto. Dili na tingali maihap sa atong mga tudlo sa kamot ug tiil ang nabiktima sa text scam. Mao nga kinahanglan gayod nga atong pahinumdoman ug pahimangnoan ang atong mga igsuon sa matag karon ug unya aron makabantay sila sa binuang sa text scam.

* * *

Usa ka magbabasa niining lindog mi-text kanako nga nagkanayon: "Good day. I'm Mil of Tabunok, Talisay. Gipadad-an kog text message nga gikan kunohay sa Philippine Charity Foundation. Pero wala na ko maikag sa maong mensahe kay nakabasa na ko sa imong column. Ako lang i-forward nimo ang mensahe with her number." -- 0918-3066345 (Dec. 19, 2005 -- 13:47:15)

Ang text nga nadawat sa mao natong texter nagkanayon: "Philippine Charity Foundation inform you that your cellphone number had won P800,000.00 last December 12, 2005. Text your name, age and address. For more info, call me now. I'm SAR (initial) of the accounting department, at 0910-3640931"

* * *

Mga suki, bantayi gayod ninyo kining cellphone number nga 0910-3640931. Tingalig usa kamo sa mapadad-an og congratulatory message niining maong cellphone number. Hinumdomi gayod ninyo kanunay nga imposible gayod kaayo nga modaog kamo sa usa ka promo nga wala ninyo apili.

Kining modus sa text scam ingon sa komon na kaayo sanglit makadaghan na kini mahitabo ug susama ra ang estilo. Pero daghan gihapon ang nalingla niining maong tinonto. Nagpasabot lang kini nga daghan pa sa atong kaigsuonan ang wala pa gayod masayod mahitungod niini. Tungod niini, awhagon nako ang tanang magbabasa nga ipaambit ngadto sa ilang mga higala ug silingan ang unod niining maong lindog aron sa ingon daghan ang masayod.

Sumbong ug reklamo? Text sa 0910-8105522