I-apil og kiha ang police decoy

Naglibog ko nganong migara ang kapolisan pagpangronda sa mga balay-kahilayan unya gamiton ang mismo nga polis isip decoy ug maoy makighilawas sa mga guest relation officer pagpakusog sa ilang ebidensiya sa kasong prostitusyon nga ilang ipasaka.

Angayang undangon kining estilo sa mga polis nga makighilawas sa mga prostitute sa mga nigt bars kun walay pagtugot sa korte. Dako kining kalapasan sa balaod.

Ang Integrated Bar of the Philippines nagkanayon nga kalapasan sa balaod nga Anti-Trafficking of Women ang gibuhat sa mga polis. Siyempre, gidili sa maong balaod ang pagpakighilawas sa usa ka tawo ngadto sa usa ka babaye bugti sa bayad.

Kun mao kana, madakpan man ang babaye nga gihilabtan sa polis, hasta ang polis maayong kasuhan.

Usa pa, dili man maka-probar sa kasong prostitusyon ang pagpakighilawas makausa lang sa usa ka babaye.

Klaro ang probisyon sa balaod batok sa prostitusyon. Matud pa sa Article 202 sa Revised Penal Code: "For the purposes of this article, women who, for money or profit, habitually indulge in sexual intercourse or lascivious conduct, are deemed to be prostitutes."

Busa, ang elementas nga makit-an sa balaod mao nga (1) modawat og bayad, (2) unya pirme na (habitually indulge) ang pakighilawas o binastos nga buhat sa babaye.

Sayon ang pag-probar sa bayad kay mahimo man nga ang marked money adto itunol sa manager o cashier isip bar fine. Apan lisud iprobar ang habitual nga pakighilawas nga may bayad.

Kun makausa ra hilabtan sa polis bugti sa bayad ang usa ka babaye, wala kanay prostitusyon kun atong basehan ang direkta ug literal nga gipasabot sa balaod.

Usa pa, klaro na pud nang pangabuso kanang gibuhat sa polis.

* * *

SULIRAN. Nakasabot ko sa tuyo sa mga polis nganong gusto nilang i-probar sa korte ang prostitusyon kay aron mominus kun dili man mawagtang sa hingpit ang prostitusyon sa Sugbo.

Maayong masayod hinuon ang mga polis nga dili ordinaryong sakit sa sosyidad ang prostitusyon.

Wala mosulod nianang maka-uulaw'ng trabaho ang mga babaye sa ngalan nga ganahan sila. Adunay laing rason nga angayang maoy atong basulon ug maoy atong hatagan og kasulbaran -- ang kalisud.

Wala nay laing kadangpang panginabuhi ang mga babayeng misulod nianang trabahoa.

Daghan kanila walay grado. Apan dili pud nila sala nga wala sila makatiwas sa pagtungha. May rason usab kini - ang kalisud. Kay kun wala pa maglisud ang ilang mga ginikanan, makatiwas gyud sila sa kolehiyo ug wala unta sila nianang mga nightclubs isip mga bayaran.

* * *

RVAT NAPUD! Wala na kitay mahimo pa niining desisyon sa kagamhanang nasyonal pagpasaka sa 10 porsiyento ngadto sa 12 porsiyento sa value-added tax.

Bisan nasayod ang gobyerno sa dautang epekto sa dugang porsiyento sa VAT, klaro man gud ang balaod (R.A. 9337) nga naghatag og 'standby power' ni Pres. Arroyo nga engkaso og dili makaabot sa target ang 10 porsiyento, aduna kini gahum pagpasaka niini og dos porsiyento.

Ang wala lang nako ma-uyoni ang kahilig sa mga opisyal sa gobyerno pagpangilad sa mga Pilipino aron lang mabugnaw sa ilang pagsupak nianang bag-ong balaod sa VAT.

Kanunay natong madunggan si Finance Secretary Margarito Teves nga dili angay'ng pasanginlan ang reformed value-added tax sa pagtubo sa presyo sa mga nag-unang palaliton tungod kay adunay laing mga "factor" nga kapasanginlan niini.

Matud pa ni Teves, angayang pasanginlan ang 'law of supply and demand' tungod kay mao kini ang nakaingon nganong nagmahal ang palaliton. Kun maka-estorya kini si Teves, mura na gyud og siya lang ang makamao sa 'economics' ug nga siya lang ang nasayod sa dagan sa ekonomiya sa nasud ug nga kining atong kapait nga nahiaguman bunga lamang kini sa atong kadanghag.

Dayag kaayo ang pagsaka sa nag-unang mga palaliton sama sa mga de lata nga pagkaon, sabon, gatas, ug uban pa. Ayaw ko'g ingna natayming lang ang pagpasaka sa presyo sa pagpatuman sa RVAT Law!

Asa man diay ihapak sa mga manufacturer ug mga retailers ang gipaningil nga 10 porsiyento (12 porsiyento sugod Pebrero) gikan sa gasolina o krudo? Tinunto!

* * *

GI-ABOG. Angayang mangayo og pasaylo ngadtong Jimrex Jaca ang mga opisyal sa kaulohan tungod sa pag-abog sa mga security personnel sa batan-ong boksidor atol sa press conference ni Manny Pacquiao niadtong Enero 27 sa Bulwagan Villegas sa Manila City Hall.

Kun gi-abibahan sa mga dili Pilipino ang pagpatumba ni Jimrex kang Geronimo Hernandez sa Mexico isip undercard sa Manny Pacquiao-Erik Morales bout niadtong Enero 22, walay rason nga abugon siya sa sama ra niya nga Pilipino.

Bilib lang ko sa kamapahiubsanon niining Jimrex. Mosulay pa gyud siya og 'downplay' nga wala tuyoa ang pag-abog kaniya.

Pero, dili na lang kita magpaabot pa nga mangayo og pasaylo ang taga Manila. Basta taga Manila, taga Manila gyud na, tag-as og ihi.

Kun akoy Jimrex, dili ko mamugos nga ilhon sa Manila ang akong kontribusyon sa dungog nga naangkon sa tibuok sa Pilipinas.

Dako kaayo ang nasud. Kun walay modawat niya sa Manila, nia pay Cebu, Negros ug Mindanao nga init modawat kaniya ug mo-abiba kaniya pananglit ganahan siyang moduaw niining mga lugara.

Dili lang tungod sa dili mapungngan nga pagsulbong ni Manny Pacquiao sa natad sa pamoksing, wala ra pud siyay luna alang sa atensiyon sa mga Manileño.