Modus sa upat

Mga suki, makadaghan na nato hisgoti dinhi ang modus sa mga mangunguot diin maoy paboritong biktimahon ang mga pasahero nga maghulat og jeep nga kasakyan. Bantayanan kaayo kining maong klase sa binuang tungod kay usa kini sa nauso karong mga panahona. Daghan na ang nabiktima niini nila.

Usa ka magbabasa niining lindog nga nanag-iya sa cellphone number 0920-4681170 mi-text kanako aron pagsumbong sa iyang kasinatian bahin sa mga badlongon sa katilingban. Partikular niyang gireklamo kining upat ka tawo nga ang modus mao ang pagpanguot sa bolsa ug bag sa mga pasahero nga paingon mosakay og PUJ. Take note, upat ka tawo ang naghimo niining maong modus operandi ug plansado kaayo ang ilang plano.

Kining maong upat ka tawo anha sagad mangbiktima sa may eskina sa Jones Avenue ug P. del Rosario. Sumala sa nagtaho kanako, dugay nang nag-operate kining maong mga badlongon dihang dapita. Mas mosiaw sila sa pagpasalir sa ilang tinonto atol sa adlaw'ng Lunes.

Ang estilo sa modus niining maong upat ka tawo mao nga may dala silang bag ug magpakaaron-ingnon pod nga pasahero nga naghulat og sakyanan. Sumala pa sa atong texter, mora sab og gikan sa probinsiya ang maong mga suspek. Dili gyod daling mamatikdan nga mga mangunguot diay sila.

Inig-abot sa mga PUJ nga naggikan sa uptown, hugopan dayon kini sa mga pasahero. Ang upat ka suspek monunot sa bul-og sa mga pasahero nga mag-ilogay sa pagsakay. Ang usa kanila nga nagdala og dakong bag mokalit lang pag-ali sa pultahan hinungdan nga dili dayon makasakay ang mga pasahero.

Ang pag-ali kun pagbabag sa pultahan kabahin sa estilo sa modus sa maong mga mangunguot. Kay samtang nagaali ang maong suspek sa pultahan, ang iyang tulo ka kauban nagmaneho na sa luyo sa pagpanguot. Dili sila madiparahan sa ilang makuotan tungod kay mag-ilogay man lagi sa pagsakay ang mga pasahero.

Tungod niining maong estilo sa modus, adunay uban nga mosakay og PUJ nga makamatngon nga wala na diay ang ilang wallet sa higayon nga moplite na sila. Ilang madiskubrehan nga nalaslas na diay ang ilang bolsa. Luoy intawon kaayo ang mabiktima sa ilang binuang.

Sumala sa naghatag kanako niining maong impormasyon, early birds kining maong mga suspek. Magsugod sila sa ilang pagpanguot sa panahon pa sa kaadlawon. Nindot lagi kaayong ipa-surveillance sa mga polis. Seguradong masakpan gyod kon dunay magkugi sa pagpaniid sa ilang kalihokan.

Kining upat ka mangunguot nga anha magbase sa pagpanguot sa eskina Jones ug P. del Rosario angayan gayod nga bantayan sa atong kaigsuonan aron dili sila mabiktima niining mga tawhana.

Sumbong ug reklamo? Text sa 0910-8105522