Si Somabong, basi sa VCD nga iyang gipadala dinhi nako iyang gitug-an nga nahiubos siya sa maong politiko tungod kay wa siyang angkuna nga ilang tawo. Gawas niini matud niya nga nabalaka sab siya nga mapatay siya sa mga sinugo sa kanhi niya amo nga di masayran sa publiko ang dautang mga binuhatan niini.
Si Somabong nga gitumbok nga lider sa grupo nga mitulis sa Land Bank didto sa Bogo niadtong buwan sa Agosto diin kapin sa P9 milyones ang ilang nadala miingon nga nalooy siya sa ubang mga tawo nga nalambigit sa maong kaso nga igo lang nilang gihimong sulogoon aron mopalit sa ilang konsumo samtang nagtago sila didto sa usa ka abandoned government building sa Bogo.
Akong klarohon nga wa kong kaila ni Somabong, busa wa kong kasiguro kon siya ba gyud ang anaa sa VCD hinungdan nga wa dayon nako isuwat sa dihang akong nadawat ang maong kopya. Apan karon nga nigawas na ang maong balita napugos ko sa pagsuwat sab niini.
Apan taguan lang gihapon nako ang pangalan sa politiko nga ginganlan sa nagpailang si Somabong. Matud ni Somabong nga ang maong politiko nagsugo nila nga ipapatay ang hepe sa kapolisan sa lalawigan nga si Sr/ Supt. Vicente Loot ug ang asawa niini nga si Daanbantayan Mayor Maria Luisa Loot.
Gawas sa magtiayong Loot gitug-an sab ni Somabong, kinsa nangangkong sakop kanhi sa NPA, target sab nila ang kanhi mayor sa Hindang Leyte nga si Jun Cabal. Wa hinuon molampus ang maong mga plano tungod sa kakuwang og pundo ug ingon man sa matud pa pagpaabot sa maong politiko nga molarga sa gawas sa nasud ang iyang mga ginikanan aron di kining kapasanginlan.
Apan bisan og wa hinganli ang maong politiko, apan si kanhi kongresista Celestino Martinez Jr. daling nakapanghimakak nga nagtinguha sila sa pagpatay sa magtiayong Loot. Atol sa interview sa DYLA si Martinez nagkanayon nga wa silay rason nga ipapatay ang iyang linudhan sa kasal.
Daling gipasanginlan ni Martinez ang iyang mga kaatbang sa politika nga maoy nagpaluyo niini aron pagguba sa ilang pamilya labi pa sa iyang anak tungod kay nagtinguha ni nga mopapili pagka kongresista sa ika-upat nga distrito.
Ang CIDG basi sa ilang mga affidavit sa dihang ilang gipasakaan og kaso ang tagdumala sa Papillon tungod sa pag-operate og prostitution den ilang gisaysay nga miabang sila og usa ka babaye aron gamiton sa pagpakighilawas sa wa pa ang pagpangronda.
Looy ang babaye nga ilang gigamit tungod kay gawas nga siya biktima nang daan sa kahigayonan, gipahimuslan pa gyud siya sa kapolisan ug di pa igo gipasakaan pa gyud siya og kaso. Pero luyo sa kasayuran sa maong babaye mahimo sab niyang pasakaan og kaso ang polis nga migamit niya.
Gani posibli pang mataktak sa serbisyo ang maong polis tungod sa pagpahimus niya sa maong babaye. Bisan pa og ang depensa sa kapolisan mao nga trabaho ang ilang gihimo, apan wa kinahanglana nga ilang pahimuslan ang babaye aron maestablisar nga dunay prostitution.
Sa higayon nga modawat na ang manager sa usa ka bay patigayon sa bar fine alang sa ilang mga babaye mahimo na silang dakpon nga wa kinahanglana nga gamiton pa ang babaye.
Ang Section 11 sa R.A. 9208 kon Anti-Trafficking in Persons Act, naglatid nga si bisan kinsa nga mopahimus sa serbisyo sa mga babayeng nalambigit sa prostitution mamahimong silotan pinaagi sa unom ka buwan nga community service sa unang paglapas niini ug multa nga P50 mil.
Ang ika-duha ug ang mosunod pa nga paglapas sa maong balaod nagtangag na og usa ka tuig nga pagka priso ug multa nga P100 ka libo. Kadtong mga sakop sa kapolisan nga migamit sa mga babaye'ng mugbo og lupad sa ilang operasyon kunohay mamahimong mapasakaan sa babayeng iyang gigamit og kasong administratiba didto sa Ombudsman Visayas.
Busa mas maayo tingaling tun-an ni sa mga sakop sa CIDG ang maong balaod aron di na masubli ang ilang gihimo tungod kay basin baya og magkapuliki sila og panagang sa kaso unya kon moreklamo ang babaye nga ilang gigamit.