Kampanya sa bokasyon

Ang Dios Miingon...
Pamalandong matag Domingo
Enero 22, 2006; Ikatulong Domingo sulod sa tuig
Mga Pagbasa: Jon. 3:1-5,10/1 Cor. 7:29-31/Mk. 1:4-20

Kampanya na sa Bokasyon! Lipay na pud ang mga seminarista niini sa mga tulo ka departamento sa atong Archdiocesan Seminaries: Ang Blessed John XXIII Minor Seminar (High School) San Carlos Seminar College ug ang Seminario Mayor de San Carlos (Theology). Nga sa ato pa, walay klase karong semanaha kay mga seminarista mangadto man sa mga parokya og mga tunghaang pribado ug publiko nga sakop sa Artsdyosesis sa Sugbo. Ang ilang tumong, mao ang pagkumpaniya nga unta daghan pa ang mosulod sa seminaryo. Ato silang i-ampo.

Tukma usab nga ning Semana sa Bokasyon, ang atong ebanghelyo naghisgot mahitungod sa pagdapit ni Jesus sa managsuon nga sila si Simon ug si Andres ug ang mga anak ni Sebedeo nga sila si Santiago ug si Juan. Yano ra kining mga tawhana. Mga tawong walay pormal nga edukasyon. Mga tawo kang kansang panginabuhian mao ang pagpanagat. Apan bisan pa niini, sila gitawag ug gidapit nga moambit sa misyon ni Jesus nga mao ang pagsangyaw sa Paghari sa Dios. Ug adunay pagbalhin nga nahitabo sa ilang kinabuhi. Dili na mga isda ang ilang panagaton kondili mga tawo na. Ang mensahe nga mapupo nato niini mao. Nga diha sa buhat sa Pagpangluwas, usahay himuong instrumento sa Dios kadtong mga ihid sa katilingbanong panlantaw. Himuon niyang kahimanan kadtong giisip man gani sa kadaghanan nga mga dautan og mga masupilon. Aron pinaagi ning mga tawhana, mas masabtan og mas mapaambit pa gyud ang Mensahe sa Kaluwasan alang sa tanan.

Sa matag higayon nga ako makapamalandong sa akong mga kahuyangan, bation ko gyud ang tumang kamapasalamaton nga gihatagan gihapon ko sa Dios og kahigayonan nga mangalagad kaniya diha sa Orden sa Pagkapari. Moangkon ko nga dili man gyud ko hingpit ug labaw na nga dili man ko matawag nga buotan. Apan naningkamot lang gyud aron mabatonan ang pagbag-o ug mapuy-an ang mensahe sa mahinulsolong kinabuhi.

Ning kampanya sa Bokasyon, atong pamalandongan ang tagsa-tagsa nato ka mga kinabuhi. Angay kang masayod higala, nga ikaw usab adunay tawag diha sa Pagkabalaan. Tawag nga dili lang ila sa mga kaparian ug mga relihiyoso kondili kanatong tanan, minyo ka man o dili. Ug labaw na nga dili kini mahitabo kon kita nga gitawag, dili magpatalinghug.