Gihangop nga hukom

Mihugyaw ang kalibutan sa mga tigbalita (journalists) gumikan sa silot-kamatayon nga gipakanaug sa husgado ngadto sa mipatay kang anhing Allan Dizon, photojournalist sa The Freeman ug Banat News.

Ang hukom ni Judge Ireneo Lee Gako Jr. adtong miaging adlaw gihangop dili lang sa pamilya ni Allan kundili usab sa tanang sektor sa komunidad nga dugay nang nanghimaraut sa kapintas sa pipila ka mga tawo ngadto sa mga sakop sa media.

Makasaysayon ang maong hukom ni Judge Gako. Mao pa kining labing unang silot-kamatayon nga gipakanaug batok sa usa ka journalist-killer sa nasud diin ubay-ubay nang mga tigbalita ang gipamatay.

Ang desisyon nga gibuhian ni Judge Gako hayan makapabukas sa mga hunahuna sa potential killers nga aduna pa diay hustisya nga maangkon ang ilang mabiktima.