Mga pulis na sinibak dahil sa jueteng kasuhan

NANGGAGALAITI sa angry si PNP bossing Art Lomibao nang madali ng kanyang ‘‘one strike’’ policy ang mga katulisan este mali kapulisan palang pakaang-kaang dahil sa dayaan bolahan.

Sinibak sila sa kani-kanilang mga puwesto pero dehins ko na sila papangalanan pa dahil sa kahihiyang nangyari sa kanila. Sabi nga, tinanggal dahil sa kapabayaan.

Two to three years ago binago ang law regarding sa issue ng illegal gambling binigyan ito ng mas matinding pangil ni Prez Gloria Macapagal Arroyo para kung may makalawit na patong, mananaya, financer et cetera makasuhan at patawan ng bigger penalties.

Ika nga, himas rehas sa karsel at hindi birong multa para sa mahuhuling mananaya, kubrador, financer, protector et cetera ang isisitaw este mali ipapataw palang parusa. Siguro kung ang mga kuwago ng ORA MISMO, ang kukulitin regarding sa issue ng illegal gambling dapat bigyan ng matinding parusa ang mga lespiak na tinamaan ng ‘‘one strike’’ policy ni Art. Sabi nga, kasuhan at ipataw ang new law sa kanila.

Hindi ko naman sinasabing patong sila o protector sa mga illegal gambling sa kani-kanilang hurisdiksyon pero imposibleng hindi nila alam na may dayaan bolahan nangyayari sa kanilang lugar. Sa tindi ng intelligence network ng PNP kahit na natatakasan ito ng mga nakakulong sa Crame ay dehins makakalagpas sa kanila ang illegal gambling.

Sabi nga, kahit sa taong may baktol pa bolahin ang jueteng tiyak hindi makakaligtas sa kanilang pangamoy ang baho ng kili-kili ng mga kamote. Dahil may tsapit na kapalit! He-he-he

Siguro panahon na para ipatupad ang butas este mali batas pala para magtanda ang mga patong na hindi nagbibiro ang gobierno sa mga illegal na gawain. Para naman sa mga kamoteng operator sa illegal gambling huwag ninyong sabihin na trabaho lang ang hanap ninyo ang dapat ay magtrabaho kayo nang maayos at legal.

‘‘Paano kung wala silang hotraba?’’ tanong ng kuwagong nakotongan.

"Maghanap sila ng maayos at marangal na hotraba,’’ sagot ng kuwagong manghihilot sa Kapitolyo.

‘‘Eh, wala nga mahanap,’’ naiinis na sabi ng kuwagong maninisip ng tahong.

‘‘Makipagsapalaran sila tulad ng mga OFWs,’’ sabi ng kuwagong SPO-10 sa Crame.

‘‘Wala naman silang panglagay.’’

‘‘Iyan ang problemahin na nila mga kamote.’’