Si Luzano nga nailang Marcos loyalist misang-at na usab og bag-ong impeachment complaint batok sa presidente tungod gihapon sa pasangil nga nanikas kini sa miaging 2004 nga eleksiyon hinungdan sa iyang kadaugan batok ni Fernando Poe Jr.
Ambot unsay nakaon ining abogadoha nga iya man gipugos pagsang-at ang impeachment complaint nga karon pa man untang Hulyo 24 mapupos ang usa ka tuig nga tagal nga masang-at ang laing impeachment complaint tungod sa nalatid sa Konstitusyon nga "walay laing impeachment complaint nga isang-at sulod sa usa ka tuig gikan sa pagsang-at og impeachment complaint."
Ang kampo sa oposisyon dali nga nakatimaho og dili mao sa aksiyon ni Luzano.
Nagduda ang oposisyon nga adunay mga kamot gikan sa Malacañang sa luyo ni Luzano nga nagtukmod kaniya pagsang-at sa impeachment complaint sa tuyo nga malawgaw ang "one-year bar rule" pagsang-at og impeachment sa ingon mapatay gihapon engkaso mosang-at og mas kusgang impeachment complaint ang mga kaatbang ni Arroyo.
Tinuod o dili, usa hinuon ka lehitimo nga aksiyon ang gibuhat ni Luzano. Katungod niya ang pagkuwestiyon sa "presidency" pinaagi sa pagreklamo kaniya ug pagduso og impeachment complaint diha sa Kongreso.
Ang Malacañang mohimo gyud og mga lakang aron kaprotehian ang termino ni Arroyo. Imoral man ang maong aksiyon, apan sibo lamang alang sa Palasyo ang pagprotehir nga dili mapakanaog ang amo nilang Rayna.
Walay balaod nga nagdili sa Malacañang paglawgaw sa proseso aron dili na mosaler ang bisan unsang impeachment complaint nga isang-at sa oposisyon batok sa presidente.
Kun duna may mabasol, walay lain kun dili ang atong Konstitusyon. Walay probisyon nga mag-qualify sa "one-year bar rule" nga engkaso og gamiton kini sa paglawgaw sa proseso sa impeachment complaint, i-ilawom kini sa 'exemption' sa maong probisyon ug nga kun adunay impeachment complaint nga sa tan-aw sa korte nga gitumong lang sa paglawgaw sa mas kusgan ug tukma nga impeachment complaint, ideklarar kini nga nullo.
Ang maayo nga buhaton sa oposisyon mao ang pag-kontes sa aksiyon ni Luzano. Basin pa diay og ang Korte Suprema modeklarar niini nga nullo.
Ang Sinulog nagkahulogan og "pilgrimage." Diha sa pilgrim, ang mga tawo nga gikan sa lainlaing dapit mobiyahe ug mohugop sa usa ka lugar aron moapil sa kasaulogan.
Dinhi, hugopan sa daghang mga "pilgrims" gikan sa lainlaing probinsiya sa kapupod-an ug kanasuran ang Sugbo aron mosaulog sa kapistahan sa Balaang Bata.
Apan angayang dili kini gamiton aron libugon ang konsepto sa gi-"commercialize" na pag-ayo nga Sinulog Mardi gras.
Gusto ni Mayor Tomas Osmeña nga mas modaghan pa ang gitawag niya og out-of-town contingents nga mosalmot sa Sinulog 2007.
Mao tingale kini ang hinungdan nganong kasagaran sa nakadaog sa Sinulog karong tuiga gikan sa lainlaing probinsiya.
Pagduda lang hinuon kining ako.
Apan wala ko mag-inusara sa pagtuo nga mokiyos ang gidaghanon sa mga Sugboanon nga mosalmot sa Sinulog sa mosunod nga katuigan kun ingon na ka-"deparochialize" ang Sinulog.
Mga lumad nga Sugboanon ang apil sa parada. Nahinumdom pa ko nga mismo akong inahan apil sa Sinulog parade.
Hangtod nga gi-mantsahan sa mga opisyal sa siyudad ang orihinal nga konsepto sa Sinulog aron paghawan sa agianan sa daghang mga turista ug balikbayan.
Nagtuo gani ko nga hangtod sa hangtod na kanang pagpasayaw sa mga contingents sulod sa sports complex tungod kay dinhi makakuwarta og dako ang Sinulog Foundation pinaagi sa libo ka libong tiket sa mga tumatan-aw'ng dili taga Sugbo. Ang mga Sugboanon, mosungasong man sa kadalanan pagsaksi sa orihinal nga konsepto sa Sinulog.
Ang ako man gud, paingon na sa pagka-wani ang mga Sugboanon.
Unsa kahay dagway sa Sinulog sa Sugbo apan ang mga dancers naggikan sa lainlaing probinsiya ug walay usa nga Sugboanon nga mosalmot?