Duha ka bangaw

Ang hinay nga uwan taliwa sa bulawanong sidlak sa adlaw niadtong Sabado nakamugna og di lang usa kon dili duha ka bangaw, nga daw mga taytayan nga nagsumpay sa tulo ka dakbayan nga naagian, ug nakadugang sa kamabulukon sa fluvial procession. Nga gihubad dayon sa mga deboto ni Senyor Sto. Niño nga mensahe sa pagpangga gikan sa Balaanong Bata, nga nakapahilak sa pipila tungod sa hingpit nga pasalamat nga di gyod mosipyat ang kanhi patron sa Sugbo pagpakita og timailhan sa kasuod niya sa mga Sugbuanon.

Si Mandaue City Mayor Teddy kinsa niuban sa kaliboan nga emosyonal nga nipagikan sa imahen ni Sr. Sto. Niño may laing hubad: Gipasabot niyang DYAB Abante Bisaya nga ang mga bangaw simbolo sa espesyal nga relasyon sa mga molupyo sa mga syudad sa Sugbo, Mandaue ug Lapu-Lapu kay mga sakop sa Balaanong Pamilya ang ilang mga patron (Sto. Niño, anak; San Jose, amahan; ug Birhen sa Regla, inahan).

* * *

Mga magbabalak motandi sa bangaw ngadto sa daghang butang: Sa paglaom, nga kon di lang lugakan ang paningkamot maabot ra gihapon bisan ang tiilan na lang sa bangaw; o sa pangandoy nga kay labihan ra katugbaw di maabot sama sa bangaw; o sa usa sa labing matahom nga pasundayag sa kinaiyahan-ang paghagkanay sa kahayag sa adlaw ug sa kabasa sa uwan nga nisangpot sa pagbusilak sa nagkalainlaing bulok, nga wa kapugong sa ilang kaugalingon pagtiad sa tumang katagbaw.

Pero para sa mga deboto, nga dugay rang nagbalaan sa kamilagruso ni Sr. Sto. Niño, ang talagsaong mga panghitabo atol sa iyang kapiyestahan makadugang lang sa ilang way kinutoban nga pagsalig nga bisan sa daghang mga pagsuway ug kalisdanan nga ilang nahiagoman sa niaging tuig, nga mahimong madugangan pag mas bug-at nga mga palas-unon sa bag-ong tuig, may maaghop ug manggiluy-on nga Bata nga nagbantay ug andam nga mosapupo nila gikan sa hingpit nga kaalaotan.

* * *

Naghisgot na man lang god tag bangaw, niang tubag sa mga makinaadmanon sa sagad natong mga pangutana:
•Ang bangaw mamugna sa kahayag sa adlaw nga nibukhad sa langyab sa mga bulok nga nakita sa mata diha sa mga lusok sa uwan;
•Ang bawog sa bangaw mugna sa nagliyok nga mga bulok nga managsama ang kinauyokan;
•Ang adlaw kanunayng naa sa imong luyo kon mag-atubang ka sa uwan ug sa bangaw;
•Ang mga bulok sa bangaw di lang pito-puwa, orange, yellow, berde, asul, indigo ug violet-kon dili naglakip sa tanang bulok nga di na makita sa mata;
•Maduha ang bangaw kon kaduha mokidlap ang hayag sa adlaw sa mga lusok sa uwan, maong mabali ang mga bulok sa ikaduhang bangaw kon itandi sa una.

* * *

Email: leo_lastimosa@abs-cbn.com