Pagka-way batasan

Wala matarong og plano sa City Traffic Operations and Management ang trapiko atol sa Grand Procession ni Sr. Sto. Niño niadtong Sabado sa hapon.

Daghang mga motorista ang nangreklamo tungod sa mga one-way sa kadalanan hangtod wala nay klarong kalikoan sa ilang destinasyon.

Daghang mga motorista nga adunay tuyo ug buot mosulod sa downtown area ang nangatanggong niadtong Sabado. Wala gyud silay nahimo gawas sa pagpangagho sa kalagot tungod sa kawalay klarong flow sa trapiko.

Unsaon ta man? Tipik kini sa selebrasyon sa kapistahan ni Sr. Sto. Niño. Kinahanglang atong respetohan ang plano sa trapiko sa Citom bisan nagyabag kini niadtong Sabado sa hapon.

* * *

WAY BATASAN. Usa ra gyud ka traffic enforcer sa Citom ang akong gikalagotan niadtong Sabado sa hapon.

Hapit nang alas tres sa hapon sa dihang -- human sa saguyod nga dagan sa mga sakyanan gikan sa Ayala area paingong downtown -- nakasulod na unta ko nga nagmaneho sa akong jiffy diha sa dalan Mabini.

Aduna koy nakitang duha ka kolor puti nga sakyanan nga gisitar sa usa ka traffic enforcer. Human manulod sa gasoline station ang duha ka sakyanan, migimaw ko sa akong jiffy ug nananghid sa traffic enforcer nga mosulod kay sa The Freeman office ra sa dalan Manalili ko mo-parking.

Misinyas ang enforcer nga nagwarawara sa iyang kamot timaan nga dili siya mosugot nga mosulod ko.

Sa dihang naghulat kong malimpyo ang akong luyo aron maka-atras ug motuyok paingong dalan luyo sa Heritage center kay tuyo nakong moadto na lang sa Plaza Independencia motuyok, miduol kanako ang enforcer nga may nametag nga "TORREFRANCA AA JR" o "TORREDES AA JR" ug nangutana kanakong "Katoliko ba ka?"

Gisingkahan ko ang enforcer sa akong kalagot tungod kay nasinta ko sa kawalay batasan nga iyang gipakita dire kanako. Gitubag ko siyang "Nya, unsa man og Katoliko ko. Wala kay labot og Katoliko ko o dili."

Dili kita makamahay kun ingon niadto ang mood sa maong enforcer tungod sa kainit sa panahon. Apan maayong magbaton siya og pamatasan sa iyang pagpakig-atubang sa mga motorista.

Nakatayming lang siya nako nga igo ra gyud sa singhag. Kuyaw man gud og makatayming siya og motoristang yabag nga manukmag kun maglagot.

Gikuyawan ko kun makatumong og dili Katoliko nga motorista ang maong enforcer. Kana gyung dili Katoliko nga nahisakop sa relihiyon nga "hardliner" o adunay ekstremistang pagtuo.

* * *

TARONG. Dili tuyo nako ang pagpangayo sa pagsuspenso niadtong maong enforcer. Nasayod kong nanginabuhian ra usab siya hinungdan sa iyang pagpainit niadtong hapona.

Tuyo ko lang nga mabukhan sa ilang mga mata ang mga opisyal sa Citom sa ingon ayuhon na nila og hashas ang mga aplikante nga gustong mag-enforcer.

Lisud magdaghan ang ingong klase nga enforcer.

Yabag pa kining mga drayber sa mga PUJ, unya timbangan pa og yabag nga enforcer, unsa kahay hitsura sa atong mga karsada.

Daghan ko og nakailang mga enforcer. Daghan kanila mga kugihan ug kun makig-atubang sa mga drayber, bisan unsa kabadlongon, maayo man og batasan.

Dili rason ang kagamay sa suweldo ug ang kakapoy sa trabaho sa pagka-traffic enforcer ang pagbaton og dili maayong batasan diha sa trabahoan.

Kun wala na maka-uyon, undang!

* * *

SADYA. Nagpasulabi ang kasadya sa Sugbo atol sa kasaulogan sa Sinulog.

Dili dayag ang kalisud tungod sa kadaghan sa mga kalingawan nga gihugopan usab sa mga batan-on.

Apan, naluoy ko sa mga batan-ong hangtod karon wala pa gihapon makasabot sa tinuoray'ng kasaulogan sa Sinulog.

Adunay daghan nga moapil sa kasaulogan magdala hinuon og kagubot.

Tsk tsk! Hinuon, tipik kini sa selebrasyon. Aduna gyuy mga labad og ulo nga mohimo og ilang kaugalingong butang nga makapasamok sa selebrasyon.

Ako lang panghinaut nga sa umaabot, makasabot na kita sa kasaulogan.