Lisod mahibaw-an kon diin mahitabo ang pagkahanaw sa mga dukomento. Kini tungod kay ang kaso nagbalhin-balhin sa upat na ka huwes.
Ang kaso unang gihuptan ni Judge Generosa Labra, dayon gibalhin kang RTC judge Anacleto Caminade, dayon ngadto ni RTC judge Ireneo Lee-Gako ug karon naa na ni RTC judge Geraldine Faith Econg.
Dili imposible nga dunay mga bilyako nga kawani sa korte nga mihimo og maniobra aron makapalugak sa kaso batok ni Ecleo pinaagi sa pagtago sa ubang dukomento.
Ang nakapait kay dili mahibaw-an kon diin mahitabo ang pagkahanaw kay gikan sa usa ka korte ngadto sa laing korte, walay "proper inventory" kon unsa ang mga dukomento nga gibalhin.
Mao nga dili kita makatumbok kinsa ang responsable sa maong pagkahanaw.
Unsaon nga dawaton ra man sa mga kawani sa korte ang baga nga mga dukomento nga wala sutaa unsa ang sulod.
Ang tukma unta mao nga dunay himoon nga "index" sa tanang papeles. Kini aron sa dili pa dawaton sa sunod nga korte sutaon usa kon wala bay kuwang.
Karon, ang bag-ong sistema nga gipatuman ni RTC executive judge Simeon Dumdum mao nga butangan lang og pila ka pahina ang gitugyan sa usa ka korte ngadto sa laing korte.
Kay mahimo man nga butangan og laing papel didto aron lang g'yod motukma sa gidaghanon sa pahina, apan diay gikuha ang mahinungdanong dukomento.
Ikaduha, dunay ubang mga abogado nga mentras wala pay "formal offer" sa mga ebidensya didto sa korte, anaa ra kanila ang dukomento.
Kini maoy rason nga nagtoo ko nga ang ubang dukomento nga gipangita, wala pa g'yod masumiter sa korte.
Gitug-anan ko ni city prosecutor Nick Sellon nga ang ubang mga dukomento gitugyan niya kang manlalaban Arbet Sta. Ana Yongco sa wala pa kini patya.
Si Yongco maoy lead private prosecutor sa kasong parricide nga gipasaka batok ni Ecleo.
Usa ka adlaw human patya si Yongco kaniadtong Septembre 11, 2004, gisuwatan dayon ni Sellon si Dr. Felimon Yongco, ang bana ni Arbet, aron kuhaon ang mga dukomento.
Gibalibaran si Sellon. Mihimo gihapon og laing suwat si Sellon, apan sama sa gihapon wala siya magmalampuson. Ambot og unsa kadtong maong mga dukomento.
Dili na lang nato tagsa-tagsaon pa pagbutyag kon unsa nga mga dukomento ang nangahanaw.
Dili kini basta-basta nga kaso diin ang mga dukomento sa usa ka kaso mangahanaw, ilabi na niining kaso nga naglambigit ni Ecleo.
Sigurado nga mogitib diha sa huna-huna sa katawhan nga posibleng ang mikuha sa maong mga dukomento mao ang mga tawo nga natintal og kwarta.
Naluoy tawon ko sa mga staff sa RTC branch 9, mga staff ni judge Econg kay nahadlok tawon nga basin makasohan. Dihay usa sa mga staff nga nahadlok nga dili na siya maka-take og bar.
Pwerte g'yod hinoon ning kasoha. Tiaw mo, daghang mga dukomento ni Alona Bacolod-Ecleo, sama sa passport, voter's affidavit, dental records nga nangawala human siya mamatay.
Kini ang rason nga naglisud ang prosecution pagpresentar og mga documentary evidence nga mosuporta nga ang babaye nga napalgang gilabay - gisulod og itom nga garbage bag - didto sa Dalaguete, mao g'yod ang asawa ni Ecleo. Sa laktud nga pagkasulti pait.