Padulong sa kalimot

Paingon na sa kalimot ang isyu sa budget sa Southeast Asian Games kun walay mangahas pag-imbestigar sa mga tawong gituohang mibulsa sa pundo niini.

Kun kutob sa baba ang paggukod ni Mayor Tomas Osmeña ngadto kang Jonathan Guardo, ang maong isyu daw buwa lang unya nga mopaingon sa hangin. Mahanaw lang ug malimtan sa mga Sugboanon.

Aduna may city attorney's office nga mahimong tahasan pagsusi kang Guardo. Bisan mi-resign na siya (o gitangtang) apan ang iyang kaakuhan diha sa maong salapi nga iya sa katawhan angayan niyang hatagan og husay.

Mahimo usab nga imbetahan ang Ombudsman pagsusi giunsa paggasto sa Cebu SEA Games Organizing Committee ang budget ug ang donasyon sa mga dagkong establisamento nga mi-sponsor sa miaging SEA Games.

Nagpabiling kuwestiyon sa mga Sugboanon ang isyu ni Guardo ug ang tinulisokay tali niya ug kang Konsehal Sylvan Jakosalem ug Jocelyn Pesquera.

Si Guardo man, si Jakosalem o si Pesquera, maayong dili palabyon ang mga bulan hangtod mahanaw sa panumdoman sa mga tawo ang mga isyu.

Ang angay, silotan ang nakasala.

* * *

DASOK. Bisan nagdasok, dayag kaayo ang mga debotos ni Sr. Sto. Niño sa pagsaulog sa iyang nobenaryo.

Walay puas ang pagpangabot sa mga debotos sa Balaang Bata nga bisan anha na sa karsada magbarog, maminaw lang gihapon sa Santos nga Misa.

Masaksihan sa tanan ang pagdasok ug pagsugwak sa mga tawo. Masaksihan usab ang pagdaghan sa mga tawong moapil sa selebrasyon matag tuig.

Dili na paigo ang gitukod nilang dakong edipisyo atubangan sa makasaysayanon ug karaang basilika pagpalingkod sa mga debotos sa Balaang Bata.

Nagkinahanglan na og laing mas dako nga lugar aron mahimong luwas ang sitwasyon sa mga tawong moapil sa kasaulogan.

Tiaw mo kanang, anha na sa karsada magbarog ang mga tawo nga maminaw sa misa.

Nia kitay mga motorista nga walay batasan. Nakita nilang gamay kaayo og agianan, mosungasong pud pag-ayo, mobusina ra ba bisan nagpadayon ang Santos nga Misa.

* * *

BANILAD. Wala pa magsilbe ang "no traffic fault zone" diha sa Banilad road niining mga higayona.

Lipat-lipaton lang sa mga drayber sa Talamban nga PUJ ang mga traffic enforcers.

Gipatuman unta ang palisiya nga dili pakanaogan ug pasakyan gikan sa eskina sa usa ka village paingong Gaisano Country Mall.

Apan tan-aw gani sa mga drayber nga walay traffic enforcer nga nagbarug-barog, pasakyan ug pakanaugan lang gihapon nila.

Nagtuo ko nga dili mosaler ang bag-ong lagda sa trapiko diha sa Banilad kun padayon nga ingon niini ang batasan sa mga drayber.

Hangtod moabot ang Disyembre nga himuon ang ASEAN Summit, pabiling magpabadlong ang drayber ug mohimo sa naandan nilang kabuang paglipatlipat sa mga traffic enforcers.

* * *

PLATE NUMBER. Adunay daghang mga sakyanan nga nagdagan karon nga wala mogamit og awtorisadong plate number gikan sa Land Transportation Office.

Maayong awhagon nato si LTO Operations Chief Vicente Gador Jr. sa paghimo og task force pagpanakop niining mga sakyanan nga wala mogamit sa hustong plaka.

Aduna man guy mga plaka nga dili klaro ang numero. Kuyaw kini kun makasala -- makadumbol, makadam-ag og tawo o kaha makaligis -- kay kun mo-hit and run, lisud mabasahan ang plate number sa sakyanan sa mga saksi sa disgrasya.

Kasagaran sa mga sakyanan nga naggamit og dili awtorisadong plate number mga luhong sakyanan.

Daghan usab ang nagdagan nga nagtangag gihapon og "For Registration" nga plaka. Unsa man ni? Okey ra ni, Atty. Gador? Hangtod kanus-a man ang ilang paggamit?

Pananglit makaligis ang sakyanan nga nagtangag og "For Registration" nga plaka unya mo-hit and run, unsaon man pagsubay sa hingtungdan nga daghan man ang nagtangag og ingon niining plaka?