Karon, ania na usay laing magbabasa niining lindog nga mikompirmar nga aduna gyod lagiy fixers diha sa NSO. Kon nganong makalusot ang mga fixers, mao kanay tukion pag-ayo. Kini ang nakapahibulong pag-ayo sa atong kaigsuonan. Ang uban giabot na gani hinuon og daotan nga katahap.
Ang magbabasa sa akong lindog nagkanayon: "Klaro gyod, Sir, nga naay fixers sa NSO. Naa silay kasabwat (kakunsabo) kay ang fixers naay gidala-dala nga resibo nga unta ang NSO official ra ang maka-issue. Ang guard gyod, Sir. Nagkinahanglan kini og dugang imbestigasyon sa NSO aron masulbad ang problema. Kasabwat sa mga fixers ang guard kay ang resibo butangan og sign sa fixer aron unahon sa pagpasulod. Unfair, di ba?" -- 0928-2078443
Medyo bug-at na kining maong alegasyon. Dili lang una ko mokomentaryo mahitungod niini. Akong klarohon nga wala pa kita motuo niining maong sumbong, apan labing maayo nga masusi kon unsa kini ka tinuod. Kay kon tinuod man kining tanan nga gisumbong sa usa ka texter kanako, pastilan, tulibagbag kaayo kining pamation. Sintunado pa sa sista nga wala maangay.
Dili ko mamasangil nga ang guwardiya diha sa NSO kakunsabo sa mga fixer. Pero maayong himoan kini og pakisusi sa taga NSO. Basin diay kon tinuod sab gayod nga adunay guwardiya diha nga nakigkunsabo sa mga fixer. Okey ra man kon motabang sila sa mga tawo nga may transaksiyon sa NSO, basta walay nagpaluyo nga cashabotan. DIli ba, mga suki?
Ug unsa man usab ka tinuod kining sumbong nga ang mga fixers nagdala-dala na og resibo? Kinsa may nagtugot nila pagdala og resibo? Maayo gyod nga masusi kon unsa kini ka tinuod aron maklaro nato ang tanan. Dili maayo nga pasagdan lang ang operasyon sa mga fixers tungod kay nakahatag silag kahasol ug puwerhisyo sa mga tawo nga may transaksiyon diha sa NSO.