Charity raffle kuno

Daghan og estilo ang mga badlongon sa katilingban sa pagpasalir sa ilang modus operandi aron pagpangilad sa ilang isigkatawo. Kinahanglan nga magmabinantayon gayod kita kay lisod na kaayo kon mabiktima kita niining mga tawhana. Labing maayo nga masayod kita sa lainlain nilang paagi sa pagpangilad.

Usa ka magbabasa niining lindog mi-text kanako nga nagkanayon: "Good day, Sir. Mangayo unta ko nimog advice bahin sa akong nadawat nga text gikan ni Atty. RS (inisyal) nga nakadaog kuno ko og P2 million sa charity raffle. Naay DTI number ug permit number. Thanks." -- 0918-7367032

Kon akoy imong pasultihon, ako moingon nga ayaw dayon pagtuo sa maong text nga imong nadawat. Karong panahona nauso pag-ayo ang text scam. Unya kanang ngalan sa nagpailang abogado nga maoy nagpadala kanimo sa text, daghan nay nag-text kanako ug nagsumbong sa samang ngalan nga maoy nagpadala kanilag text scam. Busa, labing maayo nga dili mo na lang kini patolan.

Charity raffle kuno, ha? Nindot sab. Kadtong tawong makalitan ug madali-dalion, seguradong mokubit gayod niini. Nindot man hinuon kon matinuod kini kay ang kantidad nga madaog dako man gayod og ikatabang sa paghaw-as sa kalisod. Pero unsa may garantiya nga lehitimo ug tinuod kini? Ang DTI permit number? Dili kini balidong rason. Kapila ra may pagtumo-tumog butang og DTI permit number bisan dili tinuod nga ang maong permiso hinatag sa DTI.

Ang labing maayo, imong ikompirmar sa DTI kon may nagpasiugda ba og charity raffle nga usa ka institusyon diin konektado kanang ngalan sa abogado nga maoy nagpadala nimog text. Kon ang maong promo dili makompirmar sa DTI, nagpasabot kana nga text scam ang imong nadawat.

* * *

Sa laing bahin: "To all readers sa Banat News. Kabahin sa load nga mawagtang. Ang P30, P60 ug P115 may limitasyon o tagal. Sama sa P30, good for 2 days ra kana. If within 2 days mawagtang ang load, gikawat kana. If mapasahan mo og ringtones or picture message, ayaw ninyo i-save kay magsige sila og pasa. I-erase na lang ang ilang offer. If dili gyod mohunong sila, just change your SIMPak kay naa sad na sa Globe. By Honario Barotag."-- 0927-3657226 (Nov. 9, 2005--16:47:07)

Salamat sa imong tambag ug awhag sa atong mga magbabasa ingon man sa imong pagpasabot kanila kalabot sa limitasyon sa mga load depende sa kantidad. Hinaot nga ang imong tambag makahatag og diyotay nga giya kon unsay angay nilang buhaton.

Sumbong ug reklamo? Text sa 0910-8105522)