May mga pagduda nga himuon sa presidente ang lahugay sa iyang kabinete tungod kay nawad-an na siya og pagsalig sa mga tawo diha mismo sa iyang palibot.
Nagtuo ang pamuno-nasud nga adunay mga hudas diha sa iyang Palasyo. Kinsa kadtong suspetsahang nakigduol sa oposisyon, godbay bunot gyud ning semana.
Mangulo sa bag-ong cabinet portfolio ni Pres. Arroyo si Environment Secretary Mike Defensor. Mosaka kini sa Malacañang isip chief of staff sa presidente.
Nanguna si Interior Secretary Angelo Reyes. Nagtuo hinuon ang mga tigpaniid sa politika nga ibilin kini sa Department of Interior and Local Government (DILG) tungod kay epektibo kini sa maong puwesto.
Sunod kaniya si Malacañang Media Executive Cerge Remonde, usa ka dakong Sugboanon nga nailang suod kaayo sa presidente. Dako og purohan si Cerge tungod kay mahimo man nga i-concurrent lang ang iyang pagdumala sa mga government media firms sa iya unya puhon nga paglingkod isip kalihim sa DENR.
Gawas kang Angelo ug Cerge, migawas usab ang ngalan ni Office of the External Affairs Secreyary Ed Pamuntuan ug Transportation Undersecretary Jose Cortez.
Si Mike miduso usab og tulo ka ngalan aron papilian sa presidente nga ihulip kaniya, sila si Ramon Paje, Demetrio Ignacio, ug Armando de Castro.
Ilabi na nga nagplano ang presidente nga ang executive order unya alang sa pagtudlo ni Mike isip chief of staff mas hatagan siya og halapad nga tahas ikomparar sa kang kanhi Presidential Management Staff head Rigoberto Tiglao kang kansang appointment isip ambassador to Greece gikonpirmar na sa Commission on Appointment.
Matud pa sa atong maya sa Palasyo, si Ermita mosingit gyud kini sa mga dili opisyal nga butang sa presidente nga pahumtan karon ni Mike. Si Mike naila man gud nga usa ka maayong "crisis manager" nga napamatud-an sa nangaging mga krisis sa presidente.
Sama niadtong panawagan nilang kanhi Pres. Cory Aquino ug Senate President Franklin Drilon, ug pag-resign sa presidential economic team, si Drilon maoy nabantog nga naka-neutralize sa tanang atake sa presidency gikan sa oposisyon.
Hangtod karon, nagpabilin ang presidente sa Malacañang. Apan, ang kampo ni Ermita gibantog usab nga "dili magpalupig." Hinuon, si Mike miingon nga ikunsulta niya kang Ermita ang iyang mga trabaho.
Ambot lang, unsa kahay mahitabo sa mosunod nga mga adlaw sa Palasyo sa presidente.
Gitudlo karong bag-o isip OIC Commissioner si Napoleon Morales.
Si Morales nahimong kontrobersiyal sa dihang district collector of customs pa siya sa Batangas. Ang Ombudsman mipasaka og kasong smuggling batok mismo kaniya.
Apan bisan sa iyang pagka-kontrobersiyal milampos ang iyang kampo pagtuboy sa iyang ngalan hulip lang sa computer wizard, Deputy Commissioner for Management Information Systems and Technical Group (MISTG) Alexander Arevalo.
Wala magsilbe ang panaad ni Arevalo ngadto sa Kongreso nga iyang panglansangan ang mga "open drawers" sa mga kawani sa adwana, ilabi na ang mga examiners, aron walay kabutangan sa dawaton nilang suborno sa mga smugglers ug mga brokers nga manikas sa dokumento pagdeklarar sa ilang ipang-import nga mga produkto.
Naila man gud si Arevalo nga usa ka talawan nga lider. Alang sa Malacañang, dili magsilbe ang talawan sa customs.
Hangtod nga maglingkod si Morales isip komisyoner sa customs, ayahay si Cebu Customs District Collector Ma. Lourdes Mangaoang tungod kay suod kaayo kini sila.
Niadto ganing liwas Pasko, si Mangaoang kampante kaayong magpabilin sa Port of Cebu. Siya gani ang unang nahibalo diha mismo ni Morales nga gitudlo na ang naulahi ug mo-take oath na isip bag-ong customs commissioner.