EDITORYAL – Sayop nga pagtuo sa uban

Ato na usab nga gisaulog ang kapistahan ni Senyor Sto. Niño, ang giila pa gihapon nga patron sa Sugbo. Kini bisan pa nga ang Mahal nga Birhen sa Guadalupe mao nay naproklamar nga Patron sa mga Sugbuanon.

Pista Senyor ang tawag nato sa tinuig nga pangilin ni Senyor Sto. Niño. Ang atong katigulangan maoy mihatag sa maong binisaya kaayong pangan sa kapistahan sa Sugbo.

Dunay mga tinuod ug sinsero nga debotos sa Senyor nga nahimangod ug nahisubo nga ang mga bag-ong tubo nga Sugbuanon nagtuo nga ang kapistahan sa Sugbo mao ang Sinulog Festival. O ba kaha Sinulog Mardi Gras. Sayop.

Ang Sinulog Festival kabahin ra kini sa Pista Senyor. Usa ra kini ka talan-awon o kalihukan atol sa Pista Senyor.

Nailado ra ang Sinulog -- mas ilado pa gani kay sa Pista Senyor -- gumikan sa publisidad nga gihatag alang niini aron makadani og daghang turista ug sa ingon makasapi usab ang dakbayan sa Sugbo.

Malipayong Pista Senyor sa tanan!