Nabisto nang motibo

Inanay nang migimaw ang nagpahiping motibo sa mga kongresista nga nagtinguha pagbuak sa lalawigan sa Sugbo ngadto sa upat ka mga probinsiya.

Taliwala sa pangugat nilang kongresista Clavel Martinez, Simeon Kintanar ug Antonio Yapha nga kalambuan ra gyud sa ilang mga distrito maoy ilang tuyo sa tinguha nilang pagtukod og buwag nga probinsiya ug way kalambigitan ang ilang pagka last termer na sa kongreso.

Matud nila wa silay interest nga maoy mangulo sa ilang tukoron nga bag-ong probinsiya, apan taliwa sa maong pagpamakak inanay nang migitib ang kamatuoran nga ang ka hakog nila sa gahom mao gyuy nagtukmod nila sa pagtinguha nga maglain og probinsiya.

Ang mga tinubdan sa politika nagkanayon nga gisugdan na sa kampo ni Martinez ug ni kanhi Senador Sonny Osmeña nga maoy giilang ginoo sa politika ni Kintanar ug Yapha ang pagplano alang sa umaabot eleksiyon karong 2007.

Kabahin sa plano mao ang pagpapili ni Clavel atbang ni Gobernador Gwen Garcia samtang si Osmeña mopapili usab isip runningmate ni Clavel kon di molampus ang ilang plano pagtukod og dugang tulo ka mga probinsiya. Inigar pa ba gihapon ni Clavel ang iyang tinud-anay nga tuyo pagtukod og Cebu del Norte?

Pastilan, simbako og mahimong gobernador si Clavel, mao na siguro nang panahona nga matinuod ang dugay nang propaganda ni Sonny nga bangkaruta ang panudlanan sa Kapitolyo. Sa akong tan-aw ang duha ka bilyon ka pisos nga surplus sa Kapitolyo kon mahimong gobernador si Clavel duha ra gyuy padulngan kon dili moadto sa panudlanan sa Bogo moadto sa Girl Scout of the Philippines kang kansang mga bulsa gituyo pagbuslot aron modagayday paingon sa iyang personal bank account.

Ayaw sab ko'g ingna nga despirado na gyud si Sonny nga makahupot og katungdanan nga hasta pagka bise gobernador iyang daginuton gikan sa taas nga posisyon nga kanhi iyang gihuptan? Timailhan ba ni sa iyang pag-angkon nga misawop na ang adlaw alang niya sa natad sa politika?

* * *

Siguradong hilinti-an ni Gobernador Gwen Garcia ang Philippine Drug Enforcement Agency sa pagbuot buot niini og pagawas og cartographic sketch sa giingong sniper nga misuway og patay sa Bristish national nga si Simon Lao diha sa CPDRC.

Ambot unsay motibo sa PDEA pagpagawas og sketch sa ilang suspect nga di man sila maoy gitahasan sa gobernador pagpahigayon og imbistigasyon. Naglibog ko nganong gusto gyud nilang ipatoo nga sniper ang responsabli sa pinusilan sa gutter sa atop sa CPDRC.

Sa unang bahin, wa ko magtoo nga ingon nalang gyud niana ka way kabangkaagan sa armas ang mga rebelding NPA nga maoy ilang gipasanginlang nagtinguha pagpatay ni Lao. Kon tinuod nga sniper nganong caliber 45 ang bala nga nakuha sa mga imbistigador?

Matud sa PDEA Thompson sub-machine gun ang gigamit sa responsabli, misamot og kalayo sa tinuod. Ang maong matang sa armas di intawon pang sniper kon dili assault firearm. Gawas pa kon trabaho sa sniper ang maong hitabo seguradong patay na si Lao sa pagkakaron.

Wa kaha i-condition nang daan sa PDEA ang huna huna sa publiko nga duna gyuy nagtinguha pagpatay ni Lao aron simbako dunay mahitabo niini diha sa prisohan duna na silay kapasanginlan? Nabalaka ko nga dunay planong binuang aron pagsabutahi sa kaso batok sa gitumbok nga financier sa mega shabu laboratory nga si Calvin Tan.

* * *

E-mail: [email protected]