Ayaw kahadlok

May baruganan usab si Jonathan Guardo sa iyang pag-ingon nga dili maobligar sa pagpahatag og kwentada ngadto ni mayor Tomas Osmeña sa mga nagasto sa SEA-Games nga dinhi gihimo sa Sugbo.

Ang iyang rason mao nga ang kwarta nga gitugyan kaniya alang sa pag-asikaso sa mga kalihukan sa SEA-Games dinhi sa Sugbo gikan man sa nasudnong kagamhanan ug dili gikan sa City Hall.

Buyno, tukma sab si Guardo kon tinuod nga wala siya manghilabot sa pundo nga gikan sa dakbayan sa Sugbo. Apan aron sa paglimpyo sa iyang ngalan nga naduhig og pasangil, maayo usab nga mosumiter siya og kwentada.

Total unsa may mawala kaniya. Kon ako pa maoy nahimutang sa iyang dapit, mobayad ko og pahina sa mantalaan aron ipublikar ang kwentada ug magpatawag og press conference.

Sa ingon nga paagi, malimpyo ang akong ngalan gikan sa pagduda nga nakakwarta gikan sa mga donasyon gikan sa mga private individuals nga miabag sa maong sports activities.

* * *

Tan-awa, misangpot na usab ang nagkatuali nga pamahayag sa kapolisan nga mihimo og buy-bust operations batok sa giingong drug pusher diha sa barangay Carreta.

Wala magmalampuson ang mga sakop sa kanhi Regional Narcotics Office-7 sa pagpakonbikto sa giingon nila nga mga drug pushers.

Sayonan ka, si PO3 Antonino Cabal miangkon didto sa hukmanan nga siya maoy nagsilbi nga poseur buyer ug maoy midakop sa suspetsado nga si Gina Sumagat.

Iyang gibutyag nga ang kauban niyang polis nga si PO1 Benedict Molina mao usab ang midakop sa bana ni Sumagat nga si Ramil.

Apan dihang si Molina gipaatubang na sa hukmanan, lahi ang iyang bersyon.

Siya kuno si Molina maoy nagdakop ni Gina Sumagat samtang si PO3 Cabal maoy midakop ni Ramil. Nagkatuwad-tuwad ang ilang pamahayag.

Miingon usab si PO3 Cabal nga ang mga kauban niyang polis midakop sa mga suspetsado dihang mihimo siya og "counter-sign" sa paghatag na g'yod sa mga suspetsado og shabu.

Iyang gibutyag nga ang ilang senyas aron moduol na ang mga polis nga didto ra nagpaniid sa unahan mao ang pagkawot sa iyang ulo.

Apan dihang si Molina gisukit-sukit, ang ilang senyas niadtong higayona mao ang pagkadlit sa iyang lighter kay magpatoo nga manigarilyo.

Pastilan baya. Wala kaha ninyo kini tuyoa aron nga makamugna og pagduda sa huwes ug mosangpot nga maabswelto ang mga dinakpan?

Tungod sa maong mga nagtuwad-tuwad nga pamahayag sa duha ka polis nga kabahin sa mga arresting officers, wala magduha-duha ang huwes sa pag-abswelto ni Gina Sumagat.

Ang iyang bana nga si Ramil, usa ka mangingihaw og kahayopan, wala na ilakip sa pagpakanaug og hukom kay namatay na kini kaniadtong 2003.

Ang leksyon sa mga polis niining maong kaso, pagtoon mo sa inyong mga kaso. Pagpasagad na man lang sab nang inyo. Masabot kaayo nga dunay namakak.

Maoy timan-i ninyo nga sa criminal prosecution, bisan gamay'ng lama sa pagduda nga ang akusado dili gayod sad-an, ang huwes mopakanaug gayod og hukom pabor sa mga akusado.