Armas ayaw'g gamita

Ang pagbutang og "masking tape" sa sumbohan sa mga armas dili gayod maoy kasigoroan nga ang kapolisan ug militar dili na makahimo og indiscriminate firing kon ilang gusto.

Suporta ko sa lakang sa kadagkoan sa AFP Central Command nga igo ra nga mandaran ang ilang mga sakop ug pahimangnoan nga dili gayod maayo nga mopabuto sila'g armas sa pagsugat sa bag-ong tuig.

Ang tinuod dili kay sa bag-ong tuig lang, kon dili sa tanang higayon, dili gayod maayong magpataka og pabuto sa armas kay ang bala niini mahimong makaigo og tawo bisan og wala nato tuyoa.

Karong gabii, sugaton na usab nato ang pag-abot sa bag-ong tuig. Nabalaka ko nga duna gihapo'y mogamit og armas sa pagpabuto dungan sa paka-paka sa mga rebentador.

Apan ang pagbutang god og masking tape sa mga sumbohan sa armas maisip ra man nga kataw-anan. Ang tinuod, sagad sa mga polis ug militar, dunay laing armas nga gihuptan gawas sa ilang isyu sa kagamhanan.

Ang uban niini napalit nila gikan sa mga gun stores, apan ang uban gitawag nila og "savings." Ang "savings" maoy termino sa mga armas nga ilang makuha gikan sa mga dinakpan.

Busa bisan og butangan pa og masking tape ang sumbohan sa mga armas nga giisyu sa kagamhanan ngadto sa mga polis ug militar, makahimo gihapon sila pagpabuto kon maoy ilang gusto.

Dili kay mga polis ra ug militar ang maglikay sa pagpabuto, kon dili apil na ang mga sibilyan, ilabi na g'yod kadtong mga tawo nga naghupot og dili lisensyadong armas.

Kining maong mga tawo wala mabansay kon kanus-a gamiton ang armas. Gaan kaayo ang ilang mga tudlo nga mokablit sa gatilyo sa ilang mga armas aron pabuthon.

* * *

Tuguti nga lab-ason nako sa inyong kaisipan ang nahitabo sa usa ka singko-anyos nga bata nga naigo sa saag nga bala, kon wala ko masayop, atol sa pagsugat sa bag-ong tuig kaniadtong 1998.

Si Caroline Tolentino, anak og taxi driver nga nagpuyo diha sa sitio Sun-ok, Lahug - ubos nga bahin atubangan sa ganghaan sa Cebu Plaza Hotel.

Sa hapit na ang tungang gabii, ang bata nagtindog daplin sa karsada atubangan sa "entrance" sa hotel kay nagpaabot siya sa iyang amahan nga taxi driver kinsa misaad nga magdala og pansit para saw-an nila pagkaon.

Apan sa pagpaka-paka na g'yod sa buto-buto gikan sa mga rebentador, dunay tawo nga mipabuto og armas. Ang bala niini wala tuyoa nga nakaigo sa ulo sa bata.

Misud-ong man g'yod ko sa panagway sa maong bata atol sa maong higayon kay diha pa man ko sa polis kaniadto madistino, makalolooy kaayo kini nga tan-awon.

Namatay ang bata nga wala na makakita sa panagway sa iyang amahan nga gipaabot niya kay misaad nga magdala og pansit para saw-an nila pagpangaon sa pamilya atol sa bag-ong tuig.

Buot ba kamo nga duna na usa'y mahisama kang Caroline Tolentino karong tungang gabii?

* * *

Alang niadtong naghupot og armas apan wala g'yod makaagi og "training" ang pagpabuto ninyo sa armas nga itumong sa kahanginan, apan pina-slant ang pagkagunit, tabla ra kini nga duna moy gipusil sa layo.

Kon disgrasya nga dunay tawo nga maigo sa dayon na og tugpa sa bala, kusog pa kini gihapon kay mora ra man kini og naporma'g bangaw ang dagan sa bala.