Quisumbing biktima sa special OPS

Di lang ordinaryong away sa pamilya ang nahitabo tali sa negosyanteng si Norberto Quisumbing ug sa iyang anak nga si Wesy diin ang kaso nahidangat na sa korte.

Mas lawom ang hinungdan nganong nabulgar sa publiko ang angayan unta nga pribadong problema sa pamilyang Quisumbing. Ang pagpasaka ni Wesy og kaso batok sa iyang amahan tungod sa matud pa illegal nga pagtaktak niya isip dakong opisyal sa kompaniya nga gipanag-iya sa ilang pamilya klarong gisakyan og politika.

Wa na kinahanglana nga ibulgar pa ni Wesy sa publiko pinaagi sa pagpasaka og kaso didto sa korte tungod kay wa siya isalikway isip anak sa iyang amahan. Busa ang unsa mang mapundar sa iyang ginikanan gikan sa ilang mga negosyo bisan pa og dili na siya maoy nagdumala niini segurado ang iyang pahat sa katigayonan.

Sa akong tan-aw posibling nabiktima sa "special operation" ang pamilyang Quisumbing sa mga politiko diha sa ika-unom nga distrito nga naglantaw sa ilang pamilya nga dakong hulga kanila sa umaabot. Posibling karon palang giguba nang daan ang ilang giampingang bansagon pangandam sa posibling pagsakbang nila sa politika sa umaabot eleksiyon labi na nga nisibaw ang report nga usa sa sakop sa banay'ng Quisumbing ang modagan pagkamayor diha sa Mandaue sanglit di nang makapasubli si Mayor Teddy Ouano.

Saludo ko sa network sa politiko nga responsabli niini tungod kay milampos sila pagpaburot sa istorya diha sa mga mantalaan lakip na sa radyo ug telebisyon. Sayod ko og kinsay responsabli niini lakip na sa PR firm nga maoy naglihok sa maong special operation.

Akong gipalabay sa sinugdan ang akong pagduda nga may kalambigitan sa politika ang maong kontrobersiya. Apan nabanhaw ang akong pagduda sa dihang wa damha nagkasawo ang pamilya Ouano ug Soon-Ruiz sa usa ka reunion niadtong Pasko.

Magkabalik na kaha ang nabugtong relasyon sa duha ka inilang politikanhong banay sa ika-unom nga distrito nga nabugto sud sa hataas nga higayon tungod sab sa politika? Apan sinsiro kaha ang ilang tinguha sa pagpakigsumpay ug balik sa nabugtong relasyon o napugos lang sa pagpakighiusa tungod sa gilantaw'ng hulga sa politika sa umaabot?

Way mahimo ang duha ka kampo gawas sa pagpakighigala sa usag-usa aron paggamit sa hiniusa nilang pwersa batok sa gikabalak-ang hulga sa mga Quisumbing. Nasayod tang tanan sa kasapian sa pamilyang Quisumbing busa kon kini ang mosud sa politika siguradong panington og bogbog ang kontra.

Si kongresista Nerissa Soon Ruiz nagtan-aw sab nga posibling hulga niya si Teddy kon molansar pagka kongresista sanglit di na man kini kapasubli pagkamayor. Ang pamilyang Ouano sab nagtan-aw nga makatabang si Nerissa sa kandidatura ni Jonkie ang kamanghurang anak ni Teddy nga maoy ilang gi-groom nga mopuli pagkamayor.

* * *

Salamat sa Junrex Cell shop sa pag-ilis sa second hand nga cellphone nga ilang gibaligya nako. Kon nakabantay mo akong gisuwat dinhi sa maong lindog ang akong personal nga kasinatian sa Junrex sa dihang segunda mano ang cell phone nga ilang gihatag nako bisan brand new ang akong gibayran.

Posibling tinuod nga ang recordings sa telepono nga akong napalit mugna ni atol sa pag testing sa unit sa laing customer nga buot untang mopalit niini. Apan murag di makaayo alang sa ilang negosyo kon ang unit nga ilang inablihan na ug gigamit na pagpahigayon og demo maoy ilang ibaligya sa laing customer.

Di ba ang hustong pamaagi mao nga ang customer mao gyuy moabli sa seal sa box nga gisudlan sa cellphone nga gusto niining paliton? Mao nga kon wa masayod ang management sa Junrex sa hiwi nga practice sa ilang mga kawani maayo siguro nga ila ning badlongon kay makadaot ni sa ilang negosyo.

Akong subli-on salamat sa pag-ilis sa unit.

Malipayong Bag-ong Tuig.

* * *

E-mail: [email protected]