Mga numero bantayan

Makadaghan na nato hisgoti dinhi ang mahitungod sa text scam. Kana bitaw nga modus operandi nga adunay magpadala og congratulatory message sa inyong mga cellphone aron pagpatuo nga kamo nakadaog og dakong kantidad bisan wala kamoy giapilan nga bisan unsang promo nga raffle.

Pero bisan kanunay na nato kining gituki ug daghan nang mga text nga akong gihatagan og luna dinhi sa akong lindog mahitungod niini, akong ipadayon ang pagpatik sa uban pang mga text nga akong nadawat. Kini aron mabantayan sa atong suking mga magbabasa ang numero sa cellphone nga maoy tigpadala og text messages nga pangilad ug mabantayan ang maong numero.

Karong adlawa, ania na usay laing text message nga akong hatagan og luna dinhi niining ubos kong lindog. Ang nagsumbong kanako pinaagi sa text mao ang cellphone number 0928-3664780. Siya nagkanayon: Good day, Sir. Nia koy isumbong nimo. Ako si Mariel. May ni-text nako kaganina (Agosto 2, 2005) sa buntag nga nakadaog kuno ko og P5,000. Lain na sad ni nga modus. Nakabasa man god ko sa imong lindog sa Banat News bahin niini ug kining akong nasinati morag lahi sa ubang modus. Mao kini ang number sa ni-text nako: 0928-3371239. Ang iyang message nag-ingon: "Congrats!!! Your SIM card number had won P5,000 in our 2nd anniversary Free Raffle Draw last July 28, 2005. From Millionaires Club, Inc. For more info and details, call me. I'm Sec. Rey L Benitez."

Una sa tanan, atong susihon kon tinuod ba nga adunay Millionaires Club, Inc. ug kon hain kini magbase o hain ang ilang buhatan. Kon aduna man ugaling ing usa ka institusyon nga nagdala sa maong ngalan, atong sutaon kon nagpasiugda ba gayod silang tinuoray niining gitawag og 2nd Anniversary Free Raffle Draw ug kon konektado ba kanila kini si Sec. Rey L. Benitez.

Kon ilang ikompirmar nga tinuod kining ilang promo o nagpasiugda gayod silag ingon niini, mas maayo. Pero atong susihon kon lehitimo ba kining maong matang sa promo ug dili ba madehado ang mabuot nga lungsoranon.

Akong klarohon nga wala kita mamasangil nga nangilad kining gitawag og Millionaires Club,Inc. Pero kadudahan gayod kining maong promo kon tinuod nga silay nagpasiugda niini. Dili sila makabasol kon daghan ang magduda niining maong sistema sa promo tungod kay nauso na man god pag-ayo karon ang text scam.

Ako nagduda sab nga duol gayod kini sa text scam. Mao nga kamong mga magbabasa, timan-i ninyo ang cellphone number 0928-3371239. Sa higayon nga makadawat kamog congratulatory message gikan sa maong numero, ayaw dayon kamog tuo. Mas maayong sutaon una ninyo ang matuod aron dili kamo mailad. Pagbantay gayod kamo kanunay...!

* * *

Sumbong ug reklamo? Text sa 0910-8105522)