Kagahapon, naaghat ko pagtawag og opisyal sa Citom aron mangutana unsang pagka-hitaboa nga bumper-to-bumper man ang sitwasyon sa Colon.
Apan wala ko kini himoa tungod kay nakahibalo man gyud ko nga bisan holidays binlan gyud unta og traffic enforcer ang mga major thoroughfares sama sa Colon, Magallanes, ug Jones.
Kapoy na unta kaayo og sige'g panawag, apan sukad nangawala na ang mga tang-an, sama nilang Jingjing Osmeña ug Bobit Avila, ug napasa na sa bisan kinsang kamot ang pagdumala sa Citom, nagyagaw na hinuon ang trapiko sa siyudad.
Karon gani, atubangan sa Gaisano Metro, mas daghang naka-orange nga jaywalking task force members ang makit-an kay sa mga traffic enforcer nga mag-man sa trapiko.
Dia pa koy laing nabantayan: Dili ba otso oras man ang duty sa mga trabahante sa gorbyerno? Nganong kadiyot ra man kaayo makit-an ang mga traffic enforcer?
Sama pananglit diha sa Colon, sa sayong buntag, wala pay traffic enforcer. Sugod sa alas 9, motungha na sa sidewalk, magsige pa gyud og tabi.
Mo-pasado alas 11 na gani, maghinayhinay na usab og kahilis ang gidaghanon sa traffic enforcer.
Sugod alas dos na usab makit-an sa karsada. Apan, alas kuwatro pa gani, wala na. Sumala pa sa reklamo nga atong nadawat, mosugod na og kahuot ang trapiko pagka-alas 4 pasado tungod kay nag-anam na og panibat ang mga traffic enforcer.
Ibalik man gyud ni Mayor Tomas Osmeña si LTFRB-7 Regional Director Rogelio "Jingjing" Osmeña pagka-hepe sa Citom, mao kini ang mga suliran nga pangitaan og sulbad.
Ang toloy nga mapalit ra unta sa tag P20 ang kilo, mapalit na karon og P50. Sa ato pa, P30 ang tubo sa presyo.
Dili katuhoan no? Pero sulayi ninyo og palit sa Pasil fishport, dili ba motig-ik kamo sa kamahal sa isda.
Duha ka factor ang gihatag ni Market Administrator Elpidio dela Victoria Jr. nga maoy hinungdan sa pagsaka sa presyo sa isda: una, ang law of supply and demand, nga kun minus ang suplay unya taas ang deman, siyempre momahal gyud ang presyo sa produkto, ikaduha, gibasol ang ulan-ulan bung sa amihan.
Ang kamahal usab sa isda didto sa Manila mao usab ang usa sa hinungdan tungod kay kadtong tigtumod og isda sa Pasil, tua na motumod sa kauluhan. Siyempre, pangiyawat ba.
Hinuon, season man karon sa karne tungod kay Pasko ug Bag-ong Tuig. Apan, ang isda, bisan unsaon dili man gyud mawala sa atong mga lamesa.
Ang maayo niini, mag-antus lang una kita sa kamahal sa isda, tungod kay gipasalig hinuon nga mobalik ra ang naandan nga presyo.
Magpasalamat kita niining klase sa mga magbabalaod nga nakasabot sa sitwasyon sa mga kabus nga mga kunsomedor nga maoy unang gitaopan sa gapasan sa e-VAT nga gitira sa gobyerno.
Nakasabot sila nga samtang nagpaburot sa pundo ang gobyerno, samtang ang mga kabus misamot og kamang sa kalisud tungod kay ngadto kanila man gihapak sa transportasyon, baligya, ug serbisyo nga naigo sa e-VAT sa produktong lana.
Sa balaod, si Pres. Arroyo gitugotan nga mopasaka og dos porsiyento sa 10 porsiyento nga e-VAT. Apan si Finance Secretary Margarito Teves nagkanayon nga sa Marso na sila mosingil og 12 porsiyento.
Karon, wala pa nato mabati ang resulta sa e-VAT kay nalingaw pa man kita.
Hinapos nang Enero nga magsugod na og alsa ang mga tawo pagkuwestiyon nianang e-VAT kay niana pa man nga panhona mabati nato ang epekto sa maong bag-ong matang sa buhis.
Apan, ulahi na tungod kay nahimo na kining balaod.
Magsabasaba man tuod kita, apan kutob ra kita diha, ilabi na nga gibalidar sa Korte Suprema ang balaod sa e-VAT. Sa ato pa konstitusyonal kini nga ipatuman.
Ang ako lang, dili ra ba moila og balaod ang mga tawo, ilabi na ang mga pordoy, kun sila na ang kulban sa kaldero.