Pinaskohan

Kadtong kusinero sa Ocean Fast Ferries Inc. (Ocean Jet) nga nagpatabang sa Renbor Patrol aron masulbad ang ilang problema apan gisuspenso na hinoon sa trabaho, midangop na g'yod sa hukmanan kagahapon.

Si Sandro Balaod, 29-anyos, minyo nga taga barangay Tabunok, Sogod, mibisita gayod sa akong opisina kagahapon gikan siya nga nagpasaka og kaso didto sa National Labor Relations Commission.

Mireklamo si Balaod nga gisuspenso siya og usa ka buwan sa tagdumala sa Ocean Jet gikan kaniadtong Disyembre 10.

Maayo ra baya manweldo ang Ocean Jet kay basi sa complaint sheet ni Balaod didto sa NLRC, akong nahibaw-an nga tag P270 ang sweldo sa ilang mga kusinero, apan wala kuno sila bayri sa ilang mga holiday pay.

Aw kining maong isyu, angayan usab nga tubagon sa management sa Ocean Jet atol sa husay adto sa NLRC karong Enero 11, 2006.

Gidayeg nako si Balaod kay may kaisog siya nga mireklamo sa kakuwangan sa ilang management, dili sama sa iyang mga kauban nga nagpakahilom lang kay mahadlok taktakon sa trabaho.

Ang reklamo ni Balaod mao ang kakuwang og "ventilation" sa kusina sa Ocean Jet diin maoy kanunay'ng mohari ang kainit panahon nga magtrabaho sila bisan panahon sa kaadlawon.

Dili man kini lisud nga pangayo sa mga kawani. Sugyot nako sa management sa Ocean Jet, ihatag ninyo ang angay'ng himoon nga mabutang sa luwas ang inyong mga kawani.

Ayaw ninyo huna-hunaa nga tumong nila nga dauton ang inyong dungog kay napugos ra sila pagdangop sa media aron nga matagad unta ang dugay na nilang reklamo.

Bisan pinaskohan na lang god ninyo ang paghatag kanila sa ilang gipangayo Sir. Malaumon ko nga mopatigbabaw unta ang diwa sa pasko kanatong tanan.

* * *

Atensyon mga polis sa Danao. Palihug og aksyon sa reklamo kabahin sa usa ka drug den nga anaa mahimutang atubangan sa karaang merkado.

Akong klarohon, anaa kini mahimutang sa Olivar Street, dili halayo sa usa ka dakung tindahan. Sigun sa akong informer nga ang drug den anaa mahimutang sa tunga nga bahin sa "Aquapure" ug "Rems Barbershop."

Ang gihatag nga giya sa akong informer nga mosulod lang ka nianang gamay'ng dalan-dalan, paingon na kana sa balay nga gihimong drug den.

Oo, unsa na mga polis sa Danao, nakuha ba ninyo ang gihatag nako nga "guide.?"

* * *

Kini laging pag-inisog nga wala na sa lugar, dili gayod magbunga og maayo.



Mao kini ang leksyon nga nakuha nila ni Joel Nodalo nga naila sa angga nga Tongol ug ni Alemar Luna.

Si Tongol nahimong "mayor" sa usa sa mga brigada sa BBRC, samtang si Luna, nahimo kaniadto nga "mayor de mayores." Pagawas nila sa prisohan, nagpabilin sa ilang kaisipan nga isog g'yod sila.

Resulta, kay duna pa man g'yod mga tawo nga magpaila nga mas labaw pang isog, aw gipatay ang duha. Wala g'yoy kumo sa pagpabilin nga kalma apan mabinantayon kanunay.

Husto ang isog, apan dili mangabuso. Ang akong baruganan mao nga dili ko isog, apan dili ko kanunay'ng magpadaug-daug.

Kon madala pa, lingiwan lang god, apan kon dili na madala, atubangon nato ang kakuyaw ug risgo.