Saad tumana

Kon ang mga kawani lang sa kagamhanan maoy saligan, dili gayod nila masumpo ang mga tawo nga magpataka lang og labay sa ilang basura sa dili tukma nga dapit.

Ang paghulma nila og grupo nga gitawag og Cebu City Environment Sanitation and Enforcement Team (Ceset) tukma unta kaayo, apan kay mihimo man sila og pasalig nga wala tumana, nangaluya ang kadaghanan sa ilang mga sakop.

Ang City Hall mipasalig nga hatagan nila og incentive ang mga sakop sa Ceset nga makadakop og malapason sa tukmang lagda sa maayong paghipos sa basura, apan mora'g sa pagka karon kutob ra kini sa pasalig.

Daghang mga sakop sa Ceset nga miangkon dihang akong gipangutana nga nangaluya na sila kay wala tumana ang gipasalig kanila kaniadtong Hulyo.

Naguol ko kay tungod niini basin og mobalik na usab kita sa uno. Sa among barangay lang, kaniadto limpyo na unta, apan karon wala na usab tagda ang magpataka og labay'g mga sagbot atubangan sa karaang ihawan sa Lorega-San Miguel.

Ingon usab niini ang sitwasyon sa ubang kabarangayan, ilabi na diha sa dalan Magallanes, dalan Colon, Taboan sa San Miguel, ug daghan pang mga dapit nga hugaw kaayo panahon sa gabii.

Ang awhag nako kaninyong mga opisyal sa dakbayan nga maoy mihimo sa pasalig, tumana ninyo kini aron nga makahatag og kadasig sa mga hingtungdan.

Kon ang inyong rason mao ang pag-process sa mga dukomento, tabangi sila nga mapadali ang pagkobra sa maong mga incentive.

* * *

Uy, kumusta ang inyong pasko? Nalipay na lang ko karong paskoha kay mora'g arang-arang karon kay sa miaging tuig.

Sa akong giingon ninyo, buotan kaayo ang mga tagdumala sa Philippine Star-The Freeman. Dili lang nako idetalyi pa. Ikaduha, dunay mga mihatag nako og gifts nga wala ko mag-expect.

Salamat kaayo sa tagdumala sa Aboitiz Group of Companies, Salcon Power Corporation, Congressman Raul del Mar, Customs Collector Des Mangaoang, Secretary Cerge Remonde, Visayan Electric Company.

Sa City Hall may mitug-an nako nga duna ko'y gift didto sa media center, apan wala pa nako mahibaw-i og diin gikan. Bisan og pila pa ang kantidad sa gift nga akong madawat, malipay kaayo ko ilabi na og wala ka magpaabot.

Apan ang labi g'yod nako nga ikalipay kon ang mga tawo nga nasuko nako, dili na unta masuko.

Nasabtan man god nako nga hangtud karon, may mga tawo pa nga naghambin og kasuko kanako bisan og ang ilang kasuko walay basihanan. Merry Christmas kaninyong tanan!

* * *

Sa usa ka santos nga misa nga gipahigayon sa barangay Lorega-San Miguel, ang pari nga nag-officiate sa misa nangasaba na sab atol sa iyang wali.

Ngano kuno nga mohatag man kita og gift ngadto sa usa ka tawo atol sa pasko nga ang "Batang Jesus" man maoy nag-birthday sa maong panahon.

Ha! Ha! Ha! Pastilan baya tawon sa maong pari. Ang buot ba niya ipasabot nga adto ra kita mohatag og gasa sa "Batang Jesus?" Kanus-a ka moadto sa langit Dre kay akong ipadala.

Kon anha sab sa mga simbahan pundoka ang mga gasa, masiguro ba g'yod nga ang Ginoo maoy makaangkon? Ayaw na gani Dre.

Hunonga na kanang imong batasan nga magsigi og pangasaba atol sa misa Dre kay ikaw ra'y gilibak sa mga nanimba. Kon dili pa insulto, paminaw ko mamiya sila kon ikaw na ang momisa.