Supervisor kuno

Kining maong estilo sa modus operandi wala mahitabo dinhi sa Sugbo kondili didto sa kaulohan. Napatik kini nga balita sa usa ka national daily tabloid niadtong miaging tuig ug hangtod karon padayon nga nag-operate kining maong modus.

Gisulat ko kini dinhi sa Banat News aron usab masayod ang mga magbabasa. Dili man god imposible nga makaabot dinhi sa Sugbo kining maong modus tungod kay maoy estilo sa mga tawo nga naghimo niini ang paglangyaw sa mga dapit nga walay nakaila kanila ug adto sila mangbiktima. Busa maayong makabantay usab ang mga Sugboanon niini.

Ang estilo mao nga manuktok sila sa kabalayan ug magpaila nga supervisor o inspector sa usa ka kompaniya nga tig-supply og tubig. Kon motuo kamo sa tanang isulti ning mga tawhana, nagsugod na kamog sulod sa ilang laang.

Ang sagad nga mahitabo mao nga pangitaon nila ang billing o statement of liabilities sa tagbalay sa tubig. Maoy alibi o rason sa mga suspek nga sa sunod buwan motaas na ang presyo sa tubig. Mao nga butangan nilag gadget ang imong meter aron makadaginot ka sa gasto sa tubig.

Dugang niini, patuohon ka sa mga suspek nga kinahanglan nang ilisan og digital meter ang imong kuwentador. Kinahanglan (kunong) magbayad ka og P6,500.00 alang sa bag-ong meter. Hulgaon ka pa nga kon dili mailisan og digital meter ang imong kuwentador, maputlan ka sa serbisyo sa tubig.

Siyembre, dili ka gustong maputlan sa serbisyo sa tubig sanglit ang tubig gikinahanglan man nato sa adlawng tanan. Mao nga mapugos kag bayad og P6,500.00. Ang wala nimo masayri, giilad ka lang sa impostor nga dako.

Nasakpan kining maong tinonto didto sa Manila tungod kay ang suspek nagpatuo sa mga residente nga buot niyang ilaron nga supervisor siya sa Nawasa. Pero wala nay Nawasa didto sa kaulohan kondili MWSS na. Maong mireport dayon ang residente ngadto sa MWSS ug nasuta nga wala silay mga tawong gisugo sa pag-ilis og meter sa mga koneksiyon sa tubig sa kabalayan.

Sa kahadlok nga masikop, misibat ang mga suspek sa lainlaing kaprobinsiyahan. Posibleng sa mga probinsiya nga ilang gilubloban na usab sila mopasalir sa ilang modus. Busa kon may mga tawo nga moabot sa inyong panimalay nga ingon niinig diskarte, itaho gilayon ngadto sa kompaniya sa tig-supply og tubig sa inyong lokalidad o ba kaha sa kapolisan.

Sumbong ug reklamo? Text sa 0910-8105522)