Daghan ang naluoy ni Guardo nga siyay nalat-an sa walay basehan nga pasangil ni Tomas.
Pastilan, ang mga "agukoy" na pud sa City Hall ang naghunghong-hunghong ni Tomas paghatag niya og mga dili mao nga impormasyon kalabot sa wala pa ma-liquidate nga pundo sa CebuSOC.
Nagduda gani ko nga kanang mga klarong "accountable officers" maoy adunay kamot ug nakabulsa sa pundo sa CebuSOC maoy nag-una-una og hunghong ni Tomas nga papaninglan si Guardo aron makoberan ang tinuod nga sila diay unta ang angay'ng paninglan.
Sa report nga atong nadawat, dili diay si Guardo ang accountable kun dili silang Konsehal Sylvan Jakosalem ug Jocelyn Pesquera tungod kay sila maoy awtorisadong makapangayo og disbursement sa pundo gikan sa siyudad.
Kun sila, sila maoy angayang pangayuan og liquidation, dili si Guardo.
Maayo ganing masayod si Tomas nga dili si Guardo maoy utangan sa Cebu City Hall kun dili ang Cebu City Hall maoy utangan ni Guardo.
Pila?
Dili gyud makahatag og saktong amount si Guardo tungod sa kadako na sa personal niyang kuwarta nga nagasto aron lang magmalampuson ang iyang mga proyekto isip chairman sa sports commission sa dakbayan.
Ang ako lang unta, dili mag-overreact si Tomas. OA ra kaayo siya nga karon dayon gusto niyang i-liquidate ni Guardo ang pundo nga nagamit sa 23rd Southeast Asian Games.
Kun seryoso pa lang sila sa ilang pag-inspeksiyon sa mga tunnel sa Ibalong Mining Resources, Inc. makita nila ang tinuoray nga sitwasyon sa sulod sa mga tunnel ug mabadlong nila kun wala magsunod sa 'safety measures' ang management sa minahan ug wala untay susamang trahedya nga mokalas og walo ka minero.
Unsaon, anha raman magyampungad sa opisina sa mga Taiwanese ang sa KM-21, nga singko minutos ang gilay-on gikan sa merkado sa Mantalongon, ang mga enhinyero sa DOE nga ipadala aron mag-inspeksiyon. Dili gani sila molahos sa KM-24 diin didto mahimutang ang mga tunnel sa Ibalong.
Ambot unsa katinuod ang pasangil nga maayo lang modawat og "R&R" fee ang mga inspektor apan anha ra maglingkod sa KM-21.
Bisan unsaon og pangulipas ni DOE Regional Director Antonio Labios, mas katuhoan ang pasangil sa mga kabanay sa mga biktma tungod kay silay pirmeng didto sa minahan, samtang si Labios anaa ra magpasinaw sa lingkuranan sa iyang opisina dinhi sa dakbayan sa Sugbo.
Isip mga Kristohanon, nagsubay na sa atong kaugatan ang pagkamanggiluy-on, pagkamanggihatagon ug pagkamaabi-abihon.
Apan dinhi lamang sa Pilipinas makit-an ang balaod nga magsilot sa mga tawo nga masakpang mohatag og limos sa mga kabus nga nagkinahanglan unya anaa magpakilimos sa kadalanan. Gisaway na sa usa ka Indian journalist ang maong klase sa balaod tungod kay wala kini mahasubay sa saktong lagda sa moralidad ug pagka-espirituhanon sa tawo.
Samtang nakasabot kita sa rason nianang Anti-Mendicancy Ordinance sa siyudad sa Sugbo nga paglimpyo sa kadalanan batok sa mga makililimos nga bara sa mata sa mga turista, mga bisita ug mga langyaw'ng negosyante nga magsuroy, angay usab natong hunahunaon nganong naingon ana ang ilang kahimtang.
Lalis na sa responsibilidad ang abtan kun utingkayon pa ang hinungdan nganong misangpot sila sa pakilimos ug nganong wala sila magtrabaho og bangko, ug nga dili sila makakaon sa Jollibee kun ilang gustohon.
Apan dili ikalimod nga ang gobyerno nagkulang sa programa alang sa mga kabus. Adunay mga proyekto alang sa mga kabus apan gigamit sa pamolitika.
Bisan tingale kada adlaw pa ang operasyon sa Anti-Mendicancy Task Force paghipos sa mga makililimos, walay kahurotan ang magpakilimos sa kadalanan kun dili ayuhon ang mga programa nga gitagana alang kanilang nag-ilaid sa kalisud.