Sukli ninyo

Nahimong kontrobersyal nga isyu ang pagpalagpot sa katungdanan sa anak ni magpapatigayon Norberto Quisumbing gikan sa ilang korporasyon tungod lang sa rason nga gikan sa pagka lalaki nagpahimo siya nga usa ka babaye.

Daghan na hinuon karon ang nagpaabot nga motan-aw sa interview ni Wesy Quisumbing nga gi-record sa ABS-CBN apan napugngan ang pagpasalida tungod sa mando sa hukmanan.

Ang abogado ni Wesy nga si Atty. Paris Real nagtoo hinoon nga wala gayo'y katungod ang regional trial court sa Sugbo pagpugong pagpasalida sa maong interview kay tua man sa Manila ang ABS-CBN.

Aw kinahanglang kombinsihon ni Atty. Real ang hukmanan aron bakwion ang giisyu nga temporary restraining order sa pagpasalida sa maong interview.

Gitangtang si Wesy sa pagka presidente ug chief executive officer sa ilang korporasyon kay nasuko kaayo ang iyang amahan human siya magpa-sex transplant.

Ang uban miingon nga dili g'yod unta kadto angay'ng himoon ni Mr. Quisumbing kay bisan unsa pa ang iyang anak - magpabilin kini nga iya g'yong anak nga angay'ng panggaon.

Gihimo nilang basihanan si Mrs. Margarita Larrañaga, kang kansang anak nga si Paco naapil nga nakonbikto sa giingong pagpanglugos, bisan unsa na lang ang gihimo para maluwas ang iyang anak gikan sa silot nga kamatayon.

Si senador Freddie Webb wala na makadaug sa eleksyon tungod sa grabe niyang pagdepensa sa iyang anak nga si Hubert, kinsa nakonbikto usab sa pagpanglugos.

Ilang gihulagway nga si Mr. Quisumbing dili unta angay'ng mohimo sa pagsalikway sa iyang anak ilabi na nga gipasidunggan siya sa usa ka unibersidad og Doctorate of Humanities.

* * *

Ang mga drayber mahimong maghugpong og dili mohatag og "tong" sa mga tawo nga magtakoban isip mga dispatchers.

Ang tinuod, wala na kinahanglana kining maong mga tawo kay ang mga pasahero makamao mobasa kon unsa nga sakyanan ang ilang sakyan.

Klaro nga pagkasulti, mga tong collectors kining maong mga tawo nga nagtakoban isip mga dispatchers.

Duha ka text messages nga akong nadawat nga nagreklamo kabahin sa mga dispatchers. Ilang gihulagway nga gidaug-daug sila sa maong mga tawo.

Ang akong ikasulti kaninyo, walay modaug-daug kon walay magpadaug-daug.

Sama sa usa ka drayber nga nagpanawan sa rota Highway Mandaue ug Liloan, nagreklamo tungod kay ang mga polis sa Mandaue maghinan-aw lang nga kolektahan sila sa mga dispatchers.

Mora man god og walay ordinansa diha sa Mandaue nga nagdili sa dispatching. Diri gani sa dakbayan sa Sugbo nga dunay ordinansa kabahin ana, magsiga ra man gihapon ang mata sa mga polis.

Sukol ra god mo nianang mga dispatcher, ayaw mo kahadlok. Usa ka drayber mitug-an nako nga dihang mihatag siya og P2, nasuko ang dispatcher og giingnan siya nga dunggabon.

Misiaw ang mga dispatchers kay kamong mga drayber mohatag man sab. Kon maghugpong pagsukol kanila, sigurado ko nga hingpit nga moundang na ang maong mga tawo pagpangilkil.