Stick to the issue!

Ang isyo niining kontrobersiya nga ato karong giatubang mao ang pangutana kon gitikas ba ang miaging eleksyon, nanawag ba ang Presidente ni Garci, unsay tuyo.

Mao na ang main issue. Kon kinsay laing nanawag, alang nako, that's beside the point. Kon miabot og 100 ka tawo ang nanawag ni Garci (nganong Garci man gyud, di man si Abalos?) waa na magpasabot nga waay kaso kon manawag ang Presidente.

Kon ang tuyo sa pagtawag mao ang pag-protect the ballots, nganong si Garci man ang pa-protekon sa balota? Nganong daghan man ang nanawag ni Garci, ug nganong waa man gyuy nanawag ni Chairman Abalos? To protect the sanctity of the ballots? Unya, sa Luzon man kaha siya na-assign, ngano man nga bahin man sa Mindanao votes ang na-sentro sa mga tawag?

Daghan pang mga pangutana ang kinahanglan tubagon ni Garci. Sayun tubagon ang maong mga pangutana kon mosulti lang siya sa tinuod. Gani, kon buot hunahunaon, waa na kinahanglana ang mga imbestigasyon sa Kongreso. All he has to do is simply tell the truth, period.

Ang nakadaot lang dinhi sa atong nasud kay samtang buot konuhay tang mopatim-aw sa kamatuoran, daghan sad nato ang motabon niini aron di kagawas.

Ang nakadaot ra ba usahay kay ang bakak maoy mo-prevail. Dasunan dayon sa media, matabonan gyud ang kamatuoran. Maoy hinungdan nga waa gyud mahimutang ang atong nasud.

Mao ni ang naka-divide sa atong nasud. Waa gyud ta mahiusa. Sigeng awhag ang Presidente pag-hiusa, apan waay nisanong tungod kay daghan kaayong mga isyo nga nagpabiling tanghaga sa hunahuna sa katawhan. Unya, ang atong mga lider iyahay lag paniguro sa ilang kaugalingong survival. Sila gyud unta ang unang mopagula sa kamatuoran.

Ang isyu karon, akong balikon, dili kon pilay nanawag ni Garci, kondili, nanawag ba ang Presidente, ka-pila, unsay tuyo! Ug kinahanglan motuo ang lungsod sa tubag.