ANG DIOS MIINGON...Responsibilidad og pagpili

Ang pagbalita ni Arkanghel Gabriel ngadto kang Maria naghulagway sa personal nga pagsanong sa tawo sa Diosnong Laraw sa Kaluwasan. Ang Pagsanong ni Maria sa Mensahe sa Dios nga mamahimo siyang Inahan sa Ikaduhang Persona sa Santisima Trinidad, maoy modelo kon nganong ang simbahan kinahanglang moabli gayud sa iyang kaugalingon ngadto sa Dios. Ug kini ang kahulogan sa usa ka responsibilidad og kaakohan. Ang unod niini mao man ang pagbaton og usa ka personal nga paagi sa pagsanong sa Diosnong Tawag alang sa Kaluwasan.

Daghan kanatong mga tawo ang dili gusto o kaha mahadlokon kaayo sa responsibilidad. Alang kanila, malisud kaayo ang pagbuhat sa usa ka responsibilidad. Mao nga daghan ang gusto nga matagbaw sa lawasnong panginahanglan nga dili gusto moalima og mga anak. Daghan ang gusto nga mo-asenso nga dili buot maghago. Ang tanan nahimong instant diha sa mga commitments og diha sa relasyon. Mao nga gipauso karon ang mga one night stands. Daghan ang buot mohupot og mga katungdanang publiko apan dili motuman sa ilang gipanumpaan. Daghan kanila ang nahimong mga agap sa gahom. Nahimo silang mga opisyal sa ngalan apan wala sa buhat.

Kini ang tukmang higayon sa pagpangutana sa atong tagsa-tagsa ka mga kaugalingon kon nahimo ba kitang matinud-anon diha sa pagtuman sa atong mga kaakohan isip Ginikanan, anak, parokyano ug igsuon. Nahimo ba kitang bukas alang sa lihok sa Espiritu Santo? Maingon nga si Maria nipili og nidawat sa responsibilidad nga manginahan sa Dios, kita gidapit pud nga mamahimong abli og andam nga mosanong sa hagit sa makanunayong kawsa sa nasudnong kausaban.