EDITORYAL - Sulbara mentras sayo pa

Mitumaw na karon ang taho nga adunay daghang mga sponsor nga wala na motuman sa ilang saad nga modonar alang sa miaging ika-23 nga Southeast Asian Games.

Kay nakadawat man diay mismo si Mayor Tomas Osmeña, maayong siyay mangulo pagsuta ug pagpa-utingkay kinsa kadtong mipasalig nga mo-donar, ilabi na kadtong nakapahimulos na sa media mileage ug ubang klase sa public exposures nga nakuha pinaagi sa SEA Games.

Aron dili makatuo ang publiko nga gitimon lamang sa mga opisyal sa Cebu SEAGames Organizing Committee (CebuSOC) ug Philippine SEAGames Organizing Committee (PhilSOC) ang estorya aron dili na ma-utingkay giunsa nila paggasto ang budget, maayong sugdan nila pag-imbestigar giunsa ug unsang-pagkaunsaa nga nagkabulilyaso man ug nagka-utang-utang sila.

Ang makahahadlok man gud kun dili masulbad kining problemaha unya adto na magsamoksamok pagpaningil ang mga gipang-utangan sa mga organizers ngadto sa ASEAN Summit sa Disyembre sunod tuig dinhi sa Sugbo.

Mosamot atong kaulaw niana.