Pagka’t ito’y birthday ng Poong Dakila;
Sa araw na ito ay iwaksi sana
Di pagkakasundo ng mga pamilya!
Higit sa pamilya’y itong buong mundo
Sana’y mapayapa sa araw ng Pasko;
Taong walang d’yos saka maka-Kristo
Magkaisa at magyakap bilang mga tao!
At sana sa Pasko’y tanging pangarapin
Ng mayama’y dukha -— dakilang mithiin;
Mga kabataa’y mag-ugnay damdamin
Ang baya’y iangat saka paunlarin!
Dapat ding sa Pasko lahat ay masigla
Mayama’t mahirap dapat magkasama;
Mga kapus-palad ay tulungan sana
Ng mga mayroon at mga maykaya!
Ngayong Pasko’y dapat pa ring magtulungan
Mga pulitiko’t itong sambayanan;
Ang mga pagkontra ay dapat iwasan
Upang maka-angat ating kabuhayan!
Marapat ding tayo ay maging matipid
Sa paggamit ng kuryente saka tubig;
Kung gagawin ito bansa ay tahimik
Lahat sasagana -— wala ring ligalig!
Ang rally at gulo di na makikita
Sa Maynila, sa Makati at sa Edsa;
Pasko’y igagalang ng NPA, terorista
Tahimik at masagana ating Noche Buena!
Kung ang bansa ay tahimik ngayong Pasko
Masayang-masaya tayong Pilipino;
Ang mga problemang balikat ng mundo
Sa kaunting langis -— masaya na tayo!