Drug den ug masyaw

Usa sa mga report nga nadawat sa cellphone sa akong secretary, nagpahibalo sa usa ka operasyon sa "drug den" diha sa dakbayan sa Danao.

Ang ngalan sa giingong nalambigit sa pagmentinar og drug den nagdala sa angga nga Esyong ug Nida. Ang ilang apelyido ako lang usa pugngan kay pahimoan nato kini og project.

Nagmentinar kining maong mga tawo og kwarto-kwarto nga anha nila pasuyopa og shabu ang mga drug user. Negosyo man god ni kay pabayron man nila ang mga mogamit sa ilang kwarto.

Tinuod, dakung kwarta uy. Sayonan ka mga tunga sa oras lang, humana tingali og suyop ang drug user, unya bayad dayon og P10.

Ang akong informer, si Agent-76, mireport nga silang mga silingan sa maong mga tagdumala sa drug den nahibulong kaayo kay nasabtan nilang suod man ang mga polis ug si Esyong.

Tambagan usa nato si Esyong nga mohunong na lang sa iyang bisyo kay aron dili siya masakuti. Papanid-an ni nako kanunay ni Agent-76 ang kalihukan niining Esyong og Nida.

Kon dili ka mohunong, aw dili ka magmahay. Ang pagmentinar og drug den daku-daku ra ba ni'g silot. Basin og mahurot unya ang imong kwarta kon madakpan ka.

* * *

Dunay driver og "habal-habal" nga nag-operate sa amihanang Sugbo mipadala usab nako og text message kabahin sa nagpadayon nga operasyon sa masyaw sa ilang dapit.

Kapoya ninyo uy. Aw dili diay ikaw, kon dili ang mga tawo nga padayong nailad sa operasyon sa mga mangingilad. Alang ni Agent-91 dugay ra kaayo nako kini nga gituki sa atong lindog.

Ayaw kahibulong nga Agent-91 ang akong tawag nimo kay mao man god ni ang katapusang numero sa imong cellphone.

Kay nangutana ka man kon duna ba go'y duwa sa Jai-alai, tubagon tika nga wala g'yod tawon. Giilad ra mo sa mga nagpasiugda anang masyaw.

Kapila na nako gipasabot ninyo nga ang mga tigpasiugda sa masyaw mao ra ang magbuot kon unsa ang numero nga ilang padag-on. Pilion nila ang numero nga gamay ra kaayo og namusta.

Balikon nako pagpasabot nga kakonsabo nila ang mga tig-imprinta sa masyaw tipsheets mao nga ang buhat-buhat nila nga numero sa kunohay "winning combinations" mao sab ang iimprinta.

Naghalhal ra man god ning atong mga polis nga wala g'yoy gihimo sa mga tig-imprinta aning mga masyaw tip sheets nga unta gitataw na man sa Court of Appeals nga legal ang city ordinance 1616.

Kining maong ordinansa maoy nagdili sa pagpangimprinta og tipsheets, pagbaligya niini og paghupot sa maong tipsheets, dinhi sa dakbayan.

Nasayod na man kamo kon asa dinhi sa dakbayan ang imprintahanan aning mga tipsheets. Dili na maayong balik-balikon pa.

Diha hinuon sa kalungsuran, ang lagda ra g'yod sa illegal gambling law maoy ilang magamit. Sagdi lang, ang inyong mga mensahe nga gipadala nako, akong gitipigan, apil ang inyong mga numero.

Mao kini ang akong basihan sa pagpadala og suwat sa Malacañang nga magpahibalo sa pagkiyogpos sa mga polis dinhi sa Sugbo sa maong sugal.

* * *

Ayaw kalimot, kadtong dunay reklamo, adto lang ipadala sa akong secretary kay ihatag ra niya nako ang inyong mensahe. Ang iyang numero 0917-3836645.