Bahin sa mangunguot

Kon nagsubay kamo kanunay niining akong lindog, tingali unyang nasuta nga kanunay na natong gihisgotan dinhi ang bahin sa modus operandi sa mga mangunguot. Midagsang man god pag-ayo ang mga mangunguot karong panahona. Mao nga sa higayon nga maghisgot akog modus sa mga mangunguot, magbaha dayon ang mga text sa akong cellphone nga mosumbong nga sila nakasinati o nabiktima usab sa maong matang sa tinonto.

Aniay usa ka text message nga nakadani nako pag-ayo mao nga hatagan ko kini og luna dinhi sa akong lindog. Ang iyang text nagkanayon: "Hello, Uriel. Nakabasa ko sa modus bahin sa mangunguot. Naa sab koy nasinati niini. Ang rota sa PUJ paingon sa Talamban maoy kusog kaayo ang panguot. Kadaghan na ko makasakay nga adunay mangunguot ug kaduha na ko hapit makuoti. Kausa nakuotan ko sa Labangon. Ang ilang sul-obon kanunay (ang mga suspek) mao ang polo ug magdala og dako nga bag nga walay sulod. Mag-sunglasses sila. Unya ang usa ka kamot kay isulod sa polo or jacket. Dayon maghinayhinay og panguot sa katupad. Kon dili ka makabantay, makuotan ka gyod. Nakakita na ko pirme niana nga estilo sa panguot. Ngilo kaayong tan-awon. Ang ako lang ikatambag sa mosakay og jeep nga kon makuotan mo, ayaw lang ka-rattle or pagsukol sa mangunguot kay daghan na sila. Dili mag-inusara ang mangunguot. Mao nga badlonga lang. Ayaw pakitai nga naglagot ka kay basin og unsaon pa hinuon ka. Kon mahimo, katawa og gamay bisan tuod nga gikuyawan ka. Para dili sila mogara, ba. Kay nakasuway na ko niini. Ako lang giingnan: 'Ayaw, Bay. Imong kamot kuhaa, Bay." Nikatawa lang unya nanaog sa Ayala kay 62-B man ang akong gisakyan niadtong tungora. I hope nga ipagawas kining akong text sa Modus kay luoy kaayo ang makuotan. Kaunom na ko makasakay nga naay mangunguot padulong sa Talamban. Way labot nako nga kaduha gyod ko makasuway nga ako mismo ang buot biktimahon. Padulong pod ko niadto sa Talamban." – 0921-2435539

Daghang salamat sa taas kaayo nimong text. Tinuod bitaw nga daghan gyod ang mga mangunguot nga mosakay sa mga PUJ nga magbiyahean sa Talamban. Daghang mga pasaherong nabiktima ang mitug-an niini kanako. May pipila gani ka PUJ driver nga mireklamo na usab kalabot niining maong tinonto kay usahay malakip man kuno sila sa mapasanginlan sa mga pasahero nga (kuno) nakigkunsabo sila sa mga mangunguot. Mao nga lakip ang mga driver mireklamo na.

Hinaot unta nga kining gipaambit nga kasinatian sa usa ka magbabasa magsilbing giya alang sa mga sumasakay aron sila mag-amping ug magbantay nga dili makuotan. Kinahanglan nga dili gayod mokompiyansa kay basin ang gikatupad mo sulod sa PUJ usa ka mangunguot.

(Sumbong ug reklamo? Text sa 0910-8105522)