Kay wa nay salig

Nahingangha si Mayor Tomas Osmeña ug si Cebu City Police chief Supt. Melvin Gayotin sa gi-report nga aduna diay nahitabong binayranay og "ransom" sa pagpangdagit nga nahitabo sa anak sa negosyante.

Nagka-problema karon ang kapolisan tungod kay nagdumili pagkooperar ang mga ginikanan sa bata, kini bisan gusto sa mayor nga ma-imbetisgahan gyud ang maong insidente.

Angayan lang nga ika-alarma sa mayor ug sa kapolisan ang pagdumili sa mga ginikanan sa bata pagkooperar ngadto kanila.

Kini tungod kay dako kining sagpa ngadto sa ilang departamento.

Nagkahulogan man gud kini og "walay pagsalig" ngadto sa lokal nga kapolisan mao nga sila-sila na lamang ang nakig-negotiate sa mga kidnaper alang sa luwas nga kagawasan sa ilang anak.